"NBA" ning Uyghur élidiki meshiq bazilirini qayta échish mumkinchiliki tenqidke uchridi

Muxbirimiz irade
2020-08-06
Élxet
Pikir
Share
Print

Amérika kéngesh palata ezasi marsha blekbérn we marko rubiyolar amérika waskétbol uyushmisi "NBA" gha Uyghur élidiki meshiq baziliri we xitay hökümiti bilen bolghan munasiwiti heqqide izahat bérishini telep qilip mektup yollighan.

Marsha blekbérn ""NBA"" ning Uyghur élide meshiq bazilirini taqash heqqide izchil bésim ishlitip kéliwatqan amérika kéngesh palata ezasi idi. U ilgirimu köp qétim "NBA" gha bu heqte mektup yazghandin kéyin, netijide, waskétbol uyushmisi "NBA" ning mu'awin komissari mark tatum 21-iyul küni kéngesh palata ezasi blekbérin'gha jawab xéti yazghan. Tatum xétide "NBA Shinjangdiki waskétbol akadémiyesi bilen bir yildin artuq waqittin béri héchqandaq alaqe qilmidi. Bizning munasiwitimizge xatime bérildi" dégenni ilgiri sürgenidi.

Halbuki yéqinda amérikaning "ESPN" téléwiziyesi bu heqte ep barghan tekshürüsh xewiride, "NBA" ning Uyghur élidiki meshiq bazilirini yene qayta échish oyi barliqini ashkarilighan. Bu xewerde yene, bu meshiq bazilirida oqughuchilarning xitay oqutquchiliri teripidin qattiq xorlinidighanliqi, Uyghur élidiki amérikaliq waskétbol oqutquchilirining bolsa yerlik saqchilarning nazaret qilishigha uchrighanliqidek ehwallarmu ashkarilan'ghanidi.

Marsha blekbérn 6-awghust küni tiwittirda qilghan sözide yuqiridiki bu ziddiyetlik sözlerni tilgha élip, "NBA" bashliqi adam silwérni derhal buninggha izahat bérishke chaqirdi. Shundaqla marko rubiyo we özining bu heqte ulargha resmiy mektup yollighanliqini jakarlidi.

Marsha blekbérn xanim yene, amérika hökümiti xitay kompartiyesining tesirini yoqitish we uning kishilik hoquq depsendichilikige qarshi turushqa tirishiwatqan bir shara'itta amérikadiki hersahening jümlidin tijaret shirketliri bolsun, meyli tenterbiye yaki köngül échish sahesi bolsun hemmisining xitay hökümitini kishilik hoquqni depsende qilghanliqi, eqliy mülk oghriliqi bilen shughullan'ghanliqidek qilmishliri üchün jazagha tartishta öz mes'uliyitini ada qilishi kéreklikini tekitlidi.

Toluq bet