Népaldiki musulmanlar Uyghurlarni qollap xitaygha qarshi namayish qilghan

Népaldiki musulmanlar 29-noyabir xitaygha qarshi namayish qilip, xitay hökümitining Uyghurlarni basturghanliqi, diniy étiqadigha buzghunchiliq qilghanliqigha naraziliq bildürgen. “Hindistan waqti géziti” ning xewer qilishiche, namayishichilar xitay hökümitining Uyghur élida minglighan meschidlerni chéqiwetkenlikini, xitayning rayondiki Uyghur musulmanlirigha tutqan wehshiyane mu'amilisini eyibligen.

Népalning pokxara shehridiki musulmanlar ötküzgen bu namayishni “Kalyankari samaj” namliq musulmanlar teshkilati uyushturghan iken. Namayishning xitay dölet mudapiye ministiri wéy féngxé xitay herbiy ziyaret omikini bashlap katmandugha kelgen küni ötküzülüshi diqqet qozghidi. Melum bolushiche, gerche xitayning Uyghurlarni depsende qilishi népaldiki musulmanlarnining naraziliqini qozghap kéliwatqili xéli bolghan bolsimu, lékin yuqiri derijilik xitay emeldari katmanduni ziyaret qilghanda xitaygha qarshi namayish ötküzülüshi tunji qétim iken.

“Xitay irqiy qirghinchiliqni toxtat” dégen lozunkilarni kötürgen namayishchilar xitayning katmanduda turushluq elchixanisigha xet tapshurghan. Ular xétide xitayning Uyghur élidiki kishilik hoquq depsendichilikini eyiblep, Uyghurlargha qaritilghan diniy basturushni toxtitishni, ularning roza tutushi, saqal qoyushi, ayallarning hijaplinishi we yighilish erkinlikige yol qoyulushini telep qilghan. Melum bolushiche, musulmanlar népal omumiy nupusning 5 pirsenini teshkil qilidiken.