“нәзлә җәвһири” ниң клиникилиқ синаққа өрлиши гуман қозғиди

Уйғур тебабитидики даимлиқ дорилардин болған “нәзлә җәвһири” йеқинда хитайниң дөләтлик дора мәһсулатлирини башқуруш идарисиниң тәстиқидин өтүп, клиникилиқ синаш басқучиға киргән.
“хитай хәвәрлири” ториниң 8-апрелдики хәвиридә ейтилишичә, бу қетимқи “нәзлә җәвһири” ни хитай пәнләр академийәси үрүмчи шөбиси физика-химийә тәтқиқат институтиниң муавин мудири, тәтқиқатчи һаҗи әкбәр әйса башчилиқидики бир гуруппа хадимлар тәйярлиған икән.

“нәзлә җәвһири” асаслиқи зукамни давалашқа ишлитилидикән. Улар һазир уйғур тебабити бойичә тоққуз хил дора тәйярлаватқан болуп, бу қетимқиси буниңдики биринчи мәһсулат икән.

Буниңдин илгири лагерға елип кетилгән уйғур теббий алимлиридин халмурат ғопурму дәл мушу хилдики уйғур тебабәт дорилирини хәлқараға йүзләндүрүшкә һәссә қошуп келиватқан иди. Бу қетим “нәзлә җәвһири” ниң клиникилиқ синақ басқучиға өрлишидә қандақ арқа көрүнүшләрниң барлиқи һәққидә көплигән гуманлар оттуриға чиқиватқанлиқи мәлум.