Amérika xelq'ara soda soti Ninestar ning émbargo qoymasliq telipini ret qilghan

Washin'gtondin muxbirimiz uyghar teyyarlidi
2024.03.06

“Yer shari sodisini tekshürüsh” (The Global Trade Review) ning 2024-yili 3-ayning 6-künidiki mexsus xewirige asaslan'ghanda, amérika xelq'ara soda soti xitayning basma shirkiti Ninestar ning émbargo qoymasliq telipini, yeni mallirini amérikigha kirgüzüshni chekleydighan tizimliktin öchürüwétish telipini ret qilghan.

Bu shirket mejburiy emgektin paydilinip yasalghan tawarlarni amérikagha kirgüzüsh sewebi bilen 2023-yili 6-ayda mejburiy emgek küchlirini cheklesh guruppisi teripidin émbargo qoyulup, qara tizimlikke élin'ghanidi. Uningdin kéyin, bu shirket amérika xelq'ara soda sotigha erz sunup, émbargoni bikar qilishni we amérika hökümitining bu shirketning tawarlirigha cheklime qoymasliqini telep qilghan.

Amérika pirézidénti jow baydén imza qoyghan mezkur “Uyghur mejburiy emgikining aldini élish qanuni” 2022-yili 21-iyundin bashlap resmiy ijra qilinishqa bashlighanidi. Mezkur qanun'gha asasen Uyghur rayonida ishlepchiqirilip, amérikigha import qilinidighan her qandaq mehsulatning Uyghur mejburiy emgiki bilen chétishliqi yoqluqi qayil qilarliq deliller bilen ispatlanmighuche, amérika bazirigha kirishi cheklen'gen. Amérika xelq'ara soda sotining Ninestar shirkitining émbargoni bikar qilish telipini ret qilishi, mezkur shirketning sotni qayil qilghudek delilliri yoqluqidin dérek béridiken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.