Кишилик һоқуқни көзитиш тәшкилати норвигийини хитайниң кишилик һоқуқ хатирисини унтуп қалмаслиққа чақирди

Мухбиримиз ирадә
2016-12-20

Бүгүн кишилик һоқуқни көзитиш тәшкилати баянат елан қилип, норвигийини хитайниң кишилик һоқуқ хатирисидики мәйданида чиң турушқа чақирди.

Тәшкилатниң асия ишлири директори софи ричардсон 20-декабир күни елан қилған баянатида, норвегийә-хитай икки дөләтниң 6 йил аввал өктичи язғучи лю шавбоға нобел мукапати берилиши билән бузулған дипломатик мунасивәтлирини нормаллаштурғанлиқини җакарлиғанлиқини тилға елип туруп “норвегийә хитай билән иқтисадий вә дипломатик мунасивәтлирини әслигә кәлтүргән икән, у һалда у хитай һөкүмитигә кишилик һоқуқ хатирисини яхшилаш һәққидики чақириқиниму әслигә кәлтүрүши керәк” деди.

У баянатини давам қилип “лю шавбо вә норвегийә һөкүмити иккиси ортақ бир тәҗрибини баштин өткүзди. Җүмлидин һәр иккилиси пикир әркинликини қоғдиғанлиқи үчүн, хитай һөкүмитиниң өчмәнликигә учрашниң бәдилиниң қандақ болидиғанлиқини тонуп йәтти. Әлвәттә лю шавбониң буниң үчүн төлигән бәдили интайин еғир болди” деди.

19-Декабир күни норвегийә ташқи ишлар министири борге бренди туюқсизла бейҗиңни зиярәт қилип, икки дөләт мунасивитиниң әслигә кәлгәнлики һәққидә бирләшмә баянат елан қилған иди.

Бирләшмә баянатта “норвегийә һөкүмити ‛бир җуңго принсипи‚ ға, җуңгониң игилик һоқуқи вә земин пүтүнлүкигә толуқ һөрмәт қилиду. Җуңгониң дөләт мәнпәитигә зиянлиқ вә икки тәрәпниң мунасивитигә тәсир йәткүзидиған һәрқандақ сөз-һәрикәтләрдин өзини йирақ тутиду” дейилгән иди. Софи ханим юқиридики бу сөзләрниң өзини биарам қилғанлиқини әскәртип туруп, әгәр норвегийә һәқиқәтән җуңголуқларниң тәрәққиятиға көңүл бөлидикән, у һалда у чоқум алди билән лю шавбониң әркин адәм сүпитидә норвигийини зиярәт қилишини қолға кәлтүрүши керәк” деди.