Kishilik hoquqni közitish teshkilati norwigiyini xitayning kishilik hoquq xatirisini untup qalmasliqqa chaqirdi

Bügün kishilik hoquqni közitish teshkilati bayanat élan qilip, norwigiyini xitayning kishilik hoquq xatirisidiki meydanida ching turushqa chaqirdi.

Teshkilatning asiya ishliri diréktori sofi richardson 20-dékabir küni élan qilghan bayanatida, norwégiye-xitay ikki döletning 6 yil awwal öktichi yazghuchi lyu shawbogha nobél mukapati bérilishi bilen buzulghan diplomatik munasiwetlirini normallashturghanliqini jakarlighanliqini tilgha élip turup “Norwégiye xitay bilen iqtisadiy we diplomatik munasiwetlirini eslige keltürgen iken, u halda u xitay hökümitige kishilik hoquq xatirisini yaxshilash heqqidiki chaqiriqinimu eslige keltürüshi kérek” dédi.

U bayanatini dawam qilip “Lyu shawbo we norwégiye hökümiti ikkisi ortaq bir tejribini bashtin ötküzdi. Jümlidin her ikkilisi pikir erkinlikini qoghdighanliqi üchün, xitay hökümitining öchmenlikige uchrashning bedilining qandaq bolidighanliqini tonup yetti. Elwette lyu shawboning buning üchün töligen bedili intayin éghir boldi” dédi.

19-Dékabir küni norwégiye tashqi ishlar ministiri borgé bréndi tuyuqsizla béyjingni ziyaret qilip, ikki dölet munasiwitining eslige kelgenliki heqqide birleshme bayanat élan qilghan idi.

Birleshme bayanatta “Norwégiye hökümiti ‛bir junggo prinsipi‚ gha, junggoning igilik hoquqi we zémin pütünlükige toluq hörmet qilidu. Junggoning dölet menpe'itige ziyanliq we ikki terepning munasiwitige tesir yetküzidighan herqandaq söz-heriketlerdin özini yiraq tutidu” déyilgen idi. Sofi xanim yuqiridiki bu sözlerning özini bi'aram qilghanliqini eskertip turup, eger norwégiye heqiqeten junggoluqlarning tereqqiyatigha köngül bölidiken, u halda u choqum aldi bilen lyu shawboning erkin adem süpitide norwigiyini ziyaret qilishini qolgha keltürüshi kérek” dédi.