Norwégiye istixbarati xitayning yawropadiki jasusluq pa'aliyiti heqqide agahlandurghan

Amérikining “Heptilik xewer” (Newsweek) torining 13-féwral künidiki xewirige asaslan'ghanda, norwégiye hökümiti bixeterlik mesilisi toghrisida yilliq doklat élan qilip, xitay jasuslirining yawropaning herqaysi jaylirida pa'aliyet élip barghanliqini alahide tilgha alghan.

Bu doklat skandinawiye dölet axbarat orgini teripidin 12-féwral küni élan qilin'ghan bolup, uningda körsitilishiche, xitayning yawropadiki jasusluq pa'aliyiti siyasiy axbarat we sana'et jasusluqi qatarliqlarni öz ichige alidiken.

Bu doklat élan qilishtin bir hepte burun, shimaliy atlantik ehdi teshkilatining ezasi bolghan gollandiyemu xitayning yawropadiki jasusluq pa'aliyetliri heqqide doklat élan qilghan. Bu doklatta xitayning qolidiki xakkérlarning ötken yil yumshaq détal yollash arqiliq gollandiye herbiy kompyutér torigha singip kirgenliki otturigha qoyulghan. Aldinqi ayda, amérika fédératsiye tekshürüsh idarisi xitay xakkérlirining “Halqiliq ul eslihe” ni nishan qilghanliqini we torni qalaymiqanlashturuwetkenlikini éytqanidi.

Mezkur xewerde déyilishiche, amérika, kanada, awstraliye we yéngi zélandiyening istixbarat emeldarliri xitay jasuslirining eqli mülük hoquqi oghrilash qilmishining misli körülmigen derijide kücheygenliki heqqide agahlandurghan.

Norwégiye istixbarat orgini élan qilghan doklatta: “Gherb dunyasi hazir bulturqigha qarighanda téximu köp bixeterlik tehditige duch keldi. Buningda asasliq rol oynawatqan xitay, rusiye we iranning qollishidiki xamasqa oxshash qoralliq guruppilar hazirqi dunya tertipige xiris qilmaqta” déyilgen.