Uyghur élidiki nuqtiliq sheherlerde “Hawa mudapi'e signali” sinaq qilin'ghan

18-Séntebir küni Uyghur élidiki bir qanche nuqtiliq sheherlerde ahalilerning hawa hujumidin mudapiye körüsh signal sistémisini sinaq qilish manéwiri élip bérilghan.

Uyghur aptonom rayonluq hökümet teripidin tarqitilghan bu heqtiki uqturushta “Yuqiriqi hawa mudapiye ségnali bérish herikitining dölet mudapiye terbiyesini kücheytish, xelq ammisining dölet mudapiyesi qarishini östürüsh üchün békitilgenliki” yézilghan.

Xitay hökümiti Uyghur élide milyonlighan kishilerni yépiq terbiye lagérlirigha qamighandin kéyin, rayonda yéqinqi ikki yildin buyan héchqandaq “Térrorluq” we “Zorawanliq” weqesining körülmigenlikini ilgiri sürgen we buni yépiq terbiye lagérlirining netijisi süpitide teshwiq qilghan idi. Ehwal shundaq iken, uning yene néme üchün urush halitide qollinilidighan hawa mudapiye ségnalini meshiq qilghanliqi diqqet qozghidi.

Dunya Uyghur qurultiyining bayanatchisi dilshat rishit bu heqte toxtilip, xitay hökümiti rayonda yürgüzüwatqan siyasetliri tüpeyli xelq'arada qattiq tenqidke uchrawatqan bir peytte uning öz sayisidinmu chöchüydighan haletke yétip kelgenlikini, xelq teripidin söyülmigen bir hakimiyetning mushundaq zorawan wasitilerge muraji'et qilidighanliqini bildürdi.

Derweqe, Uyghur élide yéqinda ziyarette bolghan ereb zhurnalist jariri xanim radiyomizgha qilghan sözide Uyghur élidiki saqchi mashinilirining künde bir qanche qétim qerellik halda sheher ichide bikardin-bikar signal bérish arqiliq sün'iy jiddiychilik yaritidighanliqini we buni atalmish “Rezil küchlerni qorqutush” nami astida qilidighanliqini éytqan idi.

Melum bolushiche, hawa mudapiye ségnali aldin signal we hawa hujumi ségnali dégen ikki tür boyiche ürümchi, sanji, shixenze, qaramay, ghulja, korla, chöchek, qumul, turpan, aqsu, qeshqer, bortala, xoten, atush we altay qatarliq jaylarda élip bérilghan.