Нур иман: «мән үлгилик уйғур болсамму, лекин хитай йәнила аиләмни мәндин тартивалди»

Мухбиримиз әркин
2019-10-09
Елхәт
Пикир
Share
Принт

Америкада турушлуқ уйғур зиялийси нур иман абдурешит 8‏-өктәбир күни американиң «ташқи сиясәт» журнилида мақалә елан қилип, хитайниң қәшқәрдики ата-аниси вә қериндашлириниң ақивитидин һесаб беришини тәләп қилди.

Мәзкур мақалә хитай һөкүмити лагердики мутләқ көп қисим тутқунларниң қоюп берилгәнликини илгири сүрүватқан бир мәзгилдә елан қилинған. Уйғур аптоном районлуқ һөкүмәтниң рәиси шөһрәт закир бу йил язда аталмиш «кәспий техника тәрбийәләш мәркәзлири» дики 90% кишиниң қанун вә маһарәт өгинип, җәмийәткә қайтип кәлгәнликини илгири сүргәниди. Лекин, нур иман абдурешит, «мән үлгилик уйғур болсамму, лекин хитай йәнила аиләмни мәндин тартивалди» сәрләвһилик мақалисидә, «бейҗиң лагердики кишиләрниң қоюп берилгәнликини илгири сүрмәктә, ундақта мениң ата-анам қени?» дәп соал қойған.

Нур иман абдурешитниң билдүрүшичә, униң қәшқәр кона шәһәрдики сайбағ районида олтурушлуқ аптомобил тиҗарәтчиси болған дадиси 54 яшлиқ абдурешит тохти, аилә аяли болған аниси таҗигүл қадир, қериндиши әмәтҗан абдурешит вә муһәммәтәли абдурешитлар лагерға елип кетилгән.

Нур иман абдурешит мақалисидә, 2017‏-йили 6‏-айдин башлап аилиси билән болған пүтүн алақисиниң үзүлгәнлики, 2 йил мабәйнидә уларниң һечқандақ из-дерикини алалмиғанлиқини билдүрүп, аилисиниң бирдин бир гунаһи уйғур болғанлиқи вә униң чәтәлдә оқуғанлиқи икәнликини тәкитлигән.

У: «шинҗаңда бастурушниң еғирлишиши билән, чәтәл уйғурларниң мәдәнийити вә сиясий мәвҗутлуқини сақлап қелишниң бирдин бир мәнбәси болуп қалди. Лекин бейҗиң үчүн бизниң өз хәлқимизни тирик тутуп турушимизниң өзини бир тәһдит болуп қалди. Күнсери еғирлишиватқан сиясий гуманхорлуқ муһитида ташқи дуня билән болған һәрқандақ алақә. . . . Азғунлуқ яки мустәқиллиқни қоллаш бешаритигә айлинип қалмақта» дегән.

Униң илгири сүрүшичә, лагердики бәзи кишиләр қоюп берилгән болсиму, лекин нурғун кишиләр мәҗбурий әмгәккә селиниш, түрмиләргә қамилиштәк тутқунлуқниң башқа хил шәкиллиригә мәһкум қилинмақтикән.

Пикирләр (0)
Share
Толуқ бәт