Nur iman: "Men ülgilik Uyghur bolsammu, lékin xitay yenila a'ilemni mendin tartiwaldi"

Muxbirimiz erkin
2019-10-09
Élxet
Pikir
Share
Print

Amérikada turushluq Uyghur ziyaliysi nur iman abduréshit 8‏-öktebir küni amérikaning "Tashqi siyaset" zhurnilida maqale élan qilip, xitayning qeshqerdiki ata-anisi we qérindashlirining aqiwitidin hésab bérishini telep qildi.

Mezkur maqale xitay hökümiti lagérdiki mutleq köp qisim tutqunlarning qoyup bérilgenlikini ilgiri sürüwatqan bir mezgilde élan qilin'ghan. Uyghur aptonom rayonluq hökümetning re'isi shöhret zakir bu yil yazda atalmish "Kespiy téxnika terbiyelesh merkezliri" diki 90% kishining qanun we maharet öginip, jem'iyetke qaytip kelgenlikini ilgiri sürgenidi. Lékin, nur iman abduréshit, "Men ülgilik Uyghur bolsammu, lékin xitay yenila a'ilemni mendin tartiwaldi" serlewhilik maqaliside, "Béyjing lagérdiki kishilerning qoyup bérilgenlikini ilgiri sürmekte, undaqta méning ata-anam qéni?" dep so'al qoyghan.

Nur iman abduréshitning bildürüshiche, uning qeshqer kona sheherdiki saybagh rayonida olturushluq aptomobil tijaretchisi bolghan dadisi 54 yashliq abduréshit toxti, a'ile ayali bolghan anisi tajigül qadir, qérindishi emetjan abduréshit we muhemmeteli abduréshitlar lagérgha élip kétilgen.

Nur iman abduréshit maqaliside, 2017‏-yili 6‏-aydin bashlap a'ilisi bilen bolghan pütün alaqisining üzülgenliki, 2 yil mabeynide ularning héchqandaq iz-dérikini alalmighanliqini bildürüp, a'ilisining birdin bir gunahi Uyghur bolghanliqi we uning chet'elde oqughanliqi ikenlikini tekitligen.

U: "Shinjangda basturushning éghirlishishi bilen, chet'el Uyghurlarning medeniyiti we siyasiy mewjutluqini saqlap qélishning birdin bir menbesi bolup qaldi. Lékin béyjing üchün bizning öz xelqimizni tirik tutup turushimizning özini bir tehdit bolup qaldi. Künséri éghirlishiwatqan siyasiy gumanxorluq muhitida tashqi dunya bilen bolghan herqandaq alaqe. . . . Azghunluq yaki musteqilliqni qollash bésharitige aylinip qalmaqta" dégen.

Uning ilgiri sürüshiche, lagérdiki bezi kishiler qoyup bérilgen bolsimu, lékin nurghun kishiler mejburiy emgekke sélinish, türmilerge qamilishtek tutqunluqning bashqa xil shekillirige mehkum qilinmaqtiken.

Toluq bet