Pa'aliyetchi nurgul sawut: “Men éhtiyat qilmay turalmaymen”

• Muxbirimiz jewlan
  2021-05-17

Yéqindin béri, xitayning chet eldiki Uyghurlargha, bolupmu pa'aliyetchilerge qaratqan tor hujumi küchiyip qalghan bolup, tor béket yochuqlardin paydillinip uchur oghrilash, közge körün'gen pa'aliyetchilerge tehdit sélish, Uyghurlar üchün pa'aliyet qiliwatqan teshkilatlar, hetta hökümet torlirini palech halgha chüshürüp qoyush qatarliq buzghunchiliqlar bilen shughullanmaqta iken.

“Muhapizetchi” gézitining xewer qilishiche, awstraliyede pa'aliyet qiliwatqan nurgul sawut xanim, xitay oydurup chiqarghan “Térrorluq gumandari” tizimlikige chüshkenlerdin bolup, 2019-yildin bashlap uning féysbuk hésabi köp qétim tor hujumigha uchrighan. Xitay xakkérliri yene nurgul xanim tonuydighan Uyghurlarning namini ishlitip uni eyibligen we uni bizar qilidighan uchurlarni yollighan, hetta uninggha uchur oghrilaydighan buzghunchi détallarni ewetken. Shu sewebtin u bir qétim téléfon almashturghan. Bundaq hujum dawam qiliwergenliki üchün, nurgul xanim awstraliye hökümitidin Uyghurlarning tor bixeterlikini qoghdashqa chaqiriq qilghan.

U hazir nahayiti éhtiyat qiliwatqan bolup, élxetlirini mexpiy nomur arqiliq achidiken, xitaygha a'it her qandaq yumshaq détalni ishletmeydiken, féysbukqimu asasen chiqmaydiken. U mundaq dégen: “Men éhtiyat qilmay turalmaymen, eger bezilerdek diqqetsizlik qilsam, bashqilarni balagha tiqip qoyushum mumkin. Biz qérindashlirimizgha wichat ishletmenglar dewatimiz, beziliri nahayiti eqilliq, kona téléfonigha wichat qachilap ishlitidu. Emma beziliri kari yoq ishlitiwéridu. Hemme Uyghur choqum tor bixeterlikini öginishi kérek”.

3-Ayda féysbuk torining bixeterlik ishliri mes'uli xitayning az dégende 500 pa'aliyetchini hujum nishani qilghanliqi, pa'alyetchiler ichide türkiye, qazaqistan, amérika, suriye, awstraliye we kanadadin torgha kiridighan Uyghurlarning barliqini doklat qilghanidi.