Nuri türkel “2021-Yilliq dunyadiki tesiri eng küchlük 50 rehber” tizimlikige kirgen

• Muxbirimiz jewlan
  2021-05-12

Dunyagha meshhur “Forbés” (Forbes) zhurnili bilen teng orunda turidighan “Bayliq” (Fortune) zhurnili yéqinda “2021-Yilliq dunyadiki tesiri eng küchlük 50 rehber” tizimlikini élan qilghan bolup, adwokat we amérika xelq'ara diniy erkinlik komitétining komissari nuri türkel bu tizimlikke kirgen.

“Bayliq” zhurnilining nuri türkelge bergen bahasida mundaq déyilgen: “Nuri türkel dangliq kishilik hoquq qoghdighuchisidur. Uning eng muhim xizmiti özi tughulghan diyardiki Uyghur we bashqa milletler uchrawatqan zulumgha merkezleshken. U yene Uyghur kishilik hoquq qurulushi hey'itining re'isi. Awam palata re'isi nensi pélosi ötken yil uni amérika xelq'ara diniy erkinlik komitétining komissari qilip teyinlidi. U xitaydiki mejburiy emgek we yerlik xelqqe yürgüzülüwatqan medeniyet qirghinchiliqini ayaghlashturush üchün amérika dölet mejlisining xitaydin paxta, toqumichiliq mehsulatliri we bashqa mallarni import qilmasliq heqqide qarar chiqirishigha türtke boldi. U yene küchlük seweblerni körsitip, amérika shirketlirini mal teminlesh liniyesini qayta berpa qilish we xitaydin soda alaqisini üzüshke chaqirdi”.

Melumatlargha qarighanda, “Bayliq” zhurnili her yili dunyada tesiri bar chong shexsler, rehberler, shirket lidérliri, hökümet xadimliri, sehiye we xeyr-saxawet orunlirida töhpe yaratqanlar, tenterbiye we sen'et saheside alahide netijilerni qolgha keltürgenler, omumen öz da'iriside muhim rol oynaydighan qabil yétekchiler we ülgilik kishilerni tallap “Dunyadiki tesiri eng küchlük 50 rehber” tizimlikige kirgüzidiken.

Bu qétimqi tizimlikte yéngi zélandiyening ayal bash ministéri jesénda ardérn 1-orun'gha, nuri türkel 17-orun'gha, nobél tinchliq mukapatigha érishken malala yüsüpzade 31-orun'gha tizilghan.