Нурий түркәл америка ширкәтлирини уйғур мәҗбурий әмгикигә қарши турушқа чақирди

Мухбиримиз ирадә
2021-01-21
Share

Америка хәлқара диний әркинлик комитетиниң комиссари нури түркәл америка ширкәтлирини уйғурларниң қул әмгәкчиләргә айландурулушиға қарши орнидин дәс турушқа чақирди.

Нурий түркәл әпәнди "ню-йорк вақти гезити" дә уйғурларниң мәҗбурий әмгәккә селиниш мәсилиси һәққидә мәхсус мақалә елан қилип, хитай һакимийитиниң узун йиллардин бери мәҗбурий әмгәкни районға қаратқан сиясәтлириниң муһим нуқтилириниң бири қилип кәлгәнликини, һелиһәм милйонлиған уйғурниң лагерларға қамилиш вә мәҗбурий қул әмгикигә селиништәк реаллиқтин қечип қутулалмиғанлиқини баян қилған.

У америка трамп һөкүмити буниңға қарши туруш үчүн кәскин тәдбирләрни алған болсиму, бирақ ширкәтләрниңму буниңда тәдбир қоллиниш мәсулийити барлиқини билдүргән.

У мундақ дегән:

"нөвәттә мәвҗут болған тәдбирләр уйғур районидики мәҗбурий әмгәк вә уйғурларниң мәҗбурий әмгики асасидики мәһсулатларға тақабил турушта йетәрлик болмаслиқи мумкин, америка ширкәтлири буниң билән қанаәтлинип қалмаслиқи керәк. Қул қилиш, җүмлидин мәҗбурий әмгәк бир милләт вә динни асас қилған кишиләргә мәқсәтлик вә кәң көләмлик һуҗум қилишниң бир парчиси сүпитидә йүргүзүлгәндә уни инсанийәткә қарши садир қилиниватқан йошурун җинайәт дәп қарашқа болиду. Хитайниң мәҗбурий әмгәк сиясити буниңға мас келиду. Шуңа бу йошурун җинайи қилмишларни қәстән яки мәқсәтсиз һалда қоллиған вә униңдин нәп алған карханилар худди иккинчи дуня урушидин кейин нурберг сот мәһкимисидә бир қисим германийә санаәтчилири сотланғанға охшаш җавабкарлиққа тартилиду".

Нурий түркәл әпәнди хитайдин мал тәминләватқан америка ширкәтлириниң тәминләш зәнҗирлиридә қул әмгики бар-йоқлуқини мустәқил һалда инчикилик билән тәкшүрүши, зөрүр тепилса хитайдики тәминләш зәнҗирлиридин ваз кечиши керәкликини билдүргән.

У мақалисидә мундақ дәп хитаб қилған: "һәрқайси тәрәпләрниң өз-ара һәмкарлиқи асасида бу мәсилидики бесимни вә тәсир күчни ашурғили болиду. Америка ширкәтлири хитай һөкүмитигә өзлириниң кархана мәсулийитигә вә кишилик һоқуққа әстайидиллиқ билән муамилә қилидиғанлиқини, уйғур районидики бу вәһшийликләргә шерик болушни халимайдиғанлиқи, зөрүр тепилса хитайдики тәминләш зәнҗирлири билән мунасивәтни үзүшкә тәйярлиқини күчлүк вә коллектип һалда билдүрүп қоюши керәк".

Нурий түркәл әпәнди җов байдин һөкүмитиниңму уйғурларниң мәҗбурий әмгәккә селиниш мәсилисигә җиддий қарайдиғанлиқидин бешарәт бәргәнликини тилға алған вә мақалиси ахирида "иккинчи дуня урушидин буянқи бир милләткә системилиқ зиянкәшлик қилиш йүз бериватқан һазирқидәк һалқилиқ бир пәйттә америка ширкәтлириниң буниңға қарши орнидин дәс туруши, әң тоғра таллаштур" дегән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт