Lagérgha élip kétilgen yazghuchi nurmemet toxtining jesitining a'ilisige tapshurup bérilgenliki ilgiri sürüldi

Muxbirimiz erkin
2019-06-10
Share

Buningdin texminen 70-80 kün awwal saqchigha élip kétilgen xotenlik yazghuchi nurmemet toxtining jesitining yéqinda a'ilisige tapshurup bérilgenliki ilgiri sürüldi. Chet'eldiki weqedin xewerdar zatlarning ijtima'iy taratqularda élan qilishiche, nurmemet toxtining jesiti 6‏-ayning bashlirida a'ilisige tapshurup bérilgen. Uchurda, uning wapat bolushtin texminen 70 kün burun yeni 4‏-ayning otturilirida "Soraydighan gep bar" dégen bahane bilen saqchigha élip kétilgenliki, u élip kétilgen künila késili qozghilip qalghanliqi, lékin "Doxturning tekshürüshige nöwet tegmey 70 kün saqlighanliqi" ilgiri sürülgen.

Nöwette, nurmemet toxtining saqchigha élip kétilish sewebi, u tayaq zerbiside wapat boldimu yaki késili qozghilip wapat boldimu, bu heqtiki tepsilatlar bizge namelum. Bu heqtiki tepsilatlar téxi yerlik da'iriler teripidin delillenmidi. U hazirgha qeder tutqunda ölgenliki ilgiri sürülgen, lékin ölümige a'it tepsilatlar toluq ashkarilanmighan nurghun Uyghur ediblirining biridur. 

Uyghur kishilik hoquq teshkilatlirining ilgiri sürüshiche, xitay hökümiti 2017‏-yili 2‏-aydin bashlap Uyghurlarni keng kölemlik tutqun qilip, 2 milyondek kishini yighiwélish lagérlirigha qamash herikitide Uyghur yazghuchilar, sen'etchiler, tilshunaslar, tarixshunaslar we edebiyatchilar uning asasliq tutqun qilish nishanlirining birige aylan'ghan. 

1949‏-Yili xoten nahiyisining tewekkül yézisida tughulghan nurmemet toxti, Uyghur hazirqi zaman edebiyatidiki yétük yazghuchilarning biri idi. Melum bolushiche, u 1984‏-yili xoten "Qashtéshi" zhurnilida élan qilin'ghan "Boytaq heqqide xatiriler" namliq esiri bilen ijadiyet sépige kirip kelgen. U "U dunyadiki soraq", "Besh tüp söget", "Ajayip kespiy a'ile", "Shah meshrep xotende", "6 Künlük padishah" qatarliq hékaye, powéstlirini élan a qilip, jem'iyette küchlük inkas qozghighanidi. 

Ijtima'iy taratqulardiki uchurlarda qeyt qilinishiche, "Merhum lagérda yaki lagérdikiler qamalghan birer doxturxanida qaza qilghanliqi yaki soraq jeryanida ölüp ketkenliki éniq emesken".

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet