“Nyokor” shirkiti Uyghur élide 64 milyon dollarliq sün'iy eqil bazisi qurmaqchi

Xitaydiki énérgiye sahesige meblegh sélishta bayraqdar bolup kéliwatqan “Nyokor” (Nyocor) shirkiti yéqinda Uyghur élide yéngi énérgiye istansisi qurulushi üchün zörür bolghan kompyutér we sün'iy eqil sistémisigha 64 milyon amérika dolliriliq meblegh salidighanliqini élan qilghan.

9-Öktebirde “Yisey dunyasi” torida élan qilin'ghan xewerde éytilishiche, sanji shehiride qurulidighan bu sün'iy eqil we kompyutér merkizi asasliqi Uyghur élidiki yéshil énérgiyeni téximu yuqiri qimmette istémal qilishqa ishlitilidiken. Mezkur qurulushni 2025-yilining axirida tamamlash pilan qiliniwatqan bolup, bash ishtabi gu'angju shehiridiki “Döletlik derijidin tashqiri kompyutér merkizi” ning Uyghur élidiki tarmaqlirigha mensup iken. Mezkur qurulush pütkendin kéyin alte yil meshghulat qilidighan bolup, yiligha 100 milyon som kirim yaritalaydiken.

Xewerde, mezkur qurulushning yuqiri sewiyelik eqliy hésablash mulazimitige ishlitilidighanliqi, shundaqla öz aldigha uchur saqlash we tor mulazimiti qilidighanliqi tekitlen'gen. Shuning bilen birge, buning xitay hökümiti tekitlewatqan shamal énérgiyesi we quyash énérgiyesige oxshash yéshil énérgiyeni tereqqiy qildurush yolidiki bir muhim qedem ikenliki algha sürülgen. Emma xewerdiki “Yerlik hökümetler mol énérgiye bayliqigha ige rayonlargha meblegh sélishqa alahide étibar bérishtek siyasetning rohini jari qildurup, mezkur qurulushning ongushluq tamamlinishini qollaydu” dégen qurlar buningdiki meqsetning yenila xitay hökümitining énérgiye éhtiyaji üchün xizmet qilish ikenlikini körsetmekte.

Melum bolushiche, “Nyokor” shirkiti xitaydiki énérgiye qézish téxnikisi we uni bashqurush ishlirigha meblegh sélishta aldinqi orunda turidighan shirket bolup, mezkur qurulush Uyghur élidiki énérgiye qézish ishlirini téximu tézlitishke zor töhpe qoshidu, dep qaralmaqta.