«Ню-йорк вақти» гезити: «хитай билән болған муамилә әхлақий қиммәт қарашлиримизни қурбан қилиш бәдилигә болмаслиқи керәк»

Мухбиримиз ирадә
2019-10-10
Елхәт
Пикир
Share
Принт

9-Сентәбир күни «ню-йорк вақти» гезитидә «хитай билән муамилә қилиш әхлақий қиммәт қарашлиримиздин ваз кечишкә әрзимәйду» мавзулуқ бир парчә мақалә елан қилинди.

Мақалини мәзкур гезитниң истон язғучиси фәрһад манҗу язған болуп, у мақалисини «биз иқтисадий тәрәққият вә технологийә хитайни әркинләштүриду, дәп қаридуқ. Әксичә у бизни чиритти» дегән җүмлә билән башлиған.

У мақалисидә дунядики қудрәтлик һакиммутләқ дөләткә айланған хитайниң өз пуқралириниң әқәллий кишилик һоқуқлирини рәт қилғанни аз дәп дуняда техи көрүлүп бақмиған дәриҗидә юқири техникилиқ бесим аппаратлирини шәкилләндүргәнликини ипадә қилған. У ундақ дегән: «хитай мана бу бесим аппаратлирини ишқа селип туруп, хитайниң ғәрбигә җайлашқан шинҗаң районидики уйғурларға қарита мәдәнийәт қирғинчилиқи йүргүзүватиду. Бу илгири тибәттә йүргүзүлгәндин нәччә һәссә еғир,» дегән.

Аптор иқтисадий җәһәттин қаттиқ күчләнгән хитайниң өз тәсир даирисини үзлүксиз кеңәйтип, пүтүн дуняни чиритиватқанлиқини, шуңа америка президенти трампниң хитай билән болған зиддийәтни пәқәтла бир сода киризиси, дәп қаримаслиқни әскәрткән.

У йеқинда америка васкетбол командиси NBA ниң хоңкоң намайишчилирини қоллиған бир тивити сәвәблик хитайдин кәчүрүм сорашқа мәҗбур болғанлиқидәк әпсуслинарлиқ вәқәни тилға елип, америкада вә шундақла дуняда әркинлик вә демократ «ғайәт зор муз тағниң пәқәтла сиртқа көрүнгән кичик бир қисми,» дәп көрсәткән. Апторниң мулаһизә қилишичә, әгәр америка вә башқа дөләтләр буниңға қарши һәрикәтләнмәйдикән, қисқа муддәт ичидила дуняниң мутләқ көп қисми хитайниң рамкиси бойичә һәрикәт қилидиған вә хитайниң юқири техникилиқ һакиммутләқ түзүми билән башқурулидиған җайларға айлинидикән. У бу сәвәблик америка һөкүмитиниң хитайниң 8 чоң юқири технологийә шеркитини чәклишини толиму җайида елинған бир қарар, дәп қарши елиш билән биргә йәнә америка һөкүмитини хитайға қарши системилашқан тәдбирләрни елишқа үндигән.

Пикирләр (0)
Share
Толуқ бәт