Xitay öktichiler obamaning shi jinpingdin némishqa Uyghurlarning saqal-burutigha chéqilghanliqini sorashni telep qildi

Amérikidiki “Puqralar küchi” namliq xitay öktichi teshkilati bayanat élan qilip, prézidént obamaning peyshenbe küni xitay re'isi shi jinping bilen körüshkende uningdin 4 halqiliq so'alni sorashni telep qildi.

“Xitay puqralar küchi” teshkilati obamaning sorishini telep qilghan töt so'alning biri, tibet we Uyghurlarning hoquqigha alaqidar. Bu so'alda obamaning “Bezi ölkilerdiki az sanliq milletlerning aptonomiye hoquqi xitay asasiy qanunining 4‏-maddisida kapaletke ige qilin'ghan bolsimu, emma ularning bu hoquqni yürgüzüshi néme üchün ret qilinidu?........ Eger sen Uyghurlarning milliy kimlikini qanunsiz yoqitishqa uruniwatqanmighan bolsang, néme üchün Uyghurlarning kommunizm péshwasi-karl marks qoyghan saqal-burut qoyushigha yol qoyulmaydu” dep sorishi telep qilin'ghan.

Xitay re'isi shi jinping peyshenbe küni obama bilen körüshidu. Shi jinping prézidént obamaning sahibxanliqidiki dunya yadro bixeterlik yighinigha qatnishish üchün washin'gton'gha kelgen idi.

“Xitay puqralar küchi” ning qalghan 3 so'ali diniy erkinlik, “Tyen'enmén weqesi”, “Döletni qanun bilen idare qilish” qa alaqidar.

“Xitay puqralar küchi” bayanatida, prézidént obamani xitay asasiy qanunigha, uning alaqidar qanunlirigha xilapliq qiliwatqan kishining wedisige ishinip ketmeslikke chaqirip, uning “Xelq'ara ten jazasini cheklesh nizami”, “Puqraliq -siyasiy heqler ehdinamisi”, u imza qoyghan bashqa xelq'ara mizanlargha emel qilishi gumanliq ikenlikini bildürgen.