Uyghur we tibet teshkilatliri 20 dölet bashliqlirigha qarita ochuq mektup élan qildi

31-Awghust küni dunya Uyghur qurultiyi, xelq'ara tibet tori, jenubiy mongghuliye insan heqliri uchur merkizi qatarliq chet'ellerde pa'aliyet élip bériwatqan besh teshkilat xangjudiki yighin'gha qatnishidighan 20 dölet bashliqlirigha qaritip ochuq mektup élan qildi.

Dunya Uyghur qurultiyi qatarliq teshkilat tor betliride bügün élan qilin'ghan bu mektupta xitayning 20 dölet bashliqliri yighini harpisida insan heqlirini depsende qilidighan bir türküm bixeterlik tedbirliri alghanliqi, chet'ellerdiki ammiwi teshkilat pa'aliyetchilirigimu yolsiz cheklimiler qoyghanliqi pakit we misallar bilen otturigha qoyulghan. Ochuq mektupta mehbus proféssor ilham toxti we nobél sahibi lyu shawboning qoyup bérilishi mesiliside héchqandaq bir ijabiy alamet yoqluqi eskertilgen.

Teshkilatlar ochuq mektupning axirida türmidiki kishilik hoquq pa'aliyetchilirining qoyup bérilishi, xangju ahalilirining hayatining normalgha qayturulushi qatarliq teleplirini otturigha qoyup, 20 dölet bashliqlirini bu jehette shi jinping we yerlik emeldarlar bilen sözlishishke dewet qilghan.

Ochuq xetke yuqiriqi 3 teshkilattin bashqa xongkong oqughuchilar fédaratsiyesi we xitay puqralar küchi teshkilatning bashliqlirimu imza qoyghan.