Xitay öktichi Uyghurlarni we ularning tughqanlirini dawamliq parakende qilmaqta

Xitay hökümitining Uyghurlarni basturush qilmishi heqqide köpligen melumatlar otturigha chiqqan bolsimu, ularning muhajirettiki Uyghurlarning uruq-tughqanlirini “Görüge éliwélish” arqiliq chet'eldiki öktichi pikirlerni ujuqturmaqchi bolushidin anche köp kishiler xewerdar emes. “Iqtisadshunas” gézitining yéqinqi xewiride bu ehwal tepsiliy bayan qilindi.

Maqalide en'gliyede olturushluq meryem isimlik bir Uyghur qizning kishiler tolimu hewes qilidighan melum bir idaride ishleydighan hemde dostliri bilen xitay tilida sözlishidighan ata-anisining “Emdi biz bilen alaqe qilmighin” dégen uchurni yollighandin kéyin iz-déreksiz ghayib bolushi mushu xildiki ehwallarning addiyghine bir misali sheklide bérilidu. Meryem gerche birnechche qétim weten'ge qaytip ata-anisi bilen körüshüshni oylighan bolsimu “Siyasiy mesile” sewebidin nurghunlighan Uyghur serxillirining ushtumtut ghayib bolup kétiwatqanliqi heqqidiki xewerler uni toxtitip qoyghan.

Kéyinche aptor diqqet qilghan yene bir ehwal en'gliyediki Uyghurlarning siyasiy pa'aliyetliride aktip bolghan bir qisim kishilerdin shu jaydiki bir qisim Uyghurlarning özini tartidighanliqi bolghan. U paranglashqan abdukérim isimlik bireylen bu jaydiki Uyghurlarda “Arimizda jasus bar” dep ‍özining sayisidin özi ürküshning bekmu éghirliqini éytip bergen. U özining londonda ötken birnechche yilliq hayatini eslesh arqiliq “Hazir men Uyghur jasuslar rastinla hemmila jayni qaplap ketkenmidu yaki biz hakimmutleq hakmiyetning chalghan dépigha ussul oynap yürüwatimizmu, dep oylinidighan bolup qaldim” dégen.