Xelq'ara olimpik komitétining xitay we rusiyege tutqan perqliq pozitsiyesi küchlük tenqidke uchridi

Xelq'ara olimpik komitétining ukra'inagha tajawuz qilghan rusiyeni eyiblep, irqiy qirghinchiliq bilen shughulliniwatqan xitaygha qarshi süküt qilishtek ikki yüzlimichiliki qattiq eyiblenmekte.

Rusiye ukrayinagha tajawuzchiliq urushi qozghighandin kéyin, xelq'ara olimpik komitéti chaqmaq tézlikide inkas qayturup, bu hujumni eyibligen idi. Ular rusiye prézidénti wiladimir putinni olimpik ordénidin mehrum qilidighanliqini jakarlash bilen birge, xelq'ara tenterbiye organlirini rusiye we bélorusiye tenheriketchilirini qara tizimlikke kirgüzüshke chaqirghan.

Gerche olimpik komitétining bu qararliri danalarche bolsimu, biraq uning téxi yéqindila irqiy qirghinchiliq bilen shughulliniwatqan xitay hökümiti sahibxanliqidiki olimpik musabiqisige tutqan pozitsiyesi arisidiki bu asman-zémin perq kishilerning diqqitini qozghighan.

“Jenubiy xitay etigenlik géziti” ning xewer qilishiche, amérika dölet mejlisi ezasi kiristofir simis bu heqte toxtilip: “Xelq'ara olimpik komitéti exlaq jehette weyran bolghan teshkilat. Uning herikitide birdeklik yoq” dégen.

2022-Yilliq béyjing qishliq olimpik musabiqisi aldida xelq'ara olimpik komitéti bu olimpikni bikar qilish yaki yötkesh heqqidiki barliq chaqiriqlargha pisent qilmighan, hetta olimpik komitétining re'isi tomas bax musabiqe aldidiki bir bayanatida “Xelq'ara olimpik komitéti siyasiy jehettin biterep bir organ, biz siyasiy mesililerge baha bermeymiz” dégen idi.

Amérika dölet mejlisi ezasi kiris simis sözide “Gerche xelq'ara olimpik komitétining rosiyeni tézdin cheklishi toghra bir qedem bolsimu, emma irqiy qirghinchiliq bilen shughulliniwatqan xitay kompartiyesining olimpik musabiqisini bikar qilish telipini ret qilishi ularning munapiqliqini ashkarilap béridu” dégen.

Dölet mejlisi ezasi jénnifir wekistonmu olimpik komitétining Uyghur mesilisde “Siyasiy bitereplik” dégen bahanining arqisigha yoshuruniwalghanliqini eyibligen.

Xitayning Uyghurlargha qaritiwatqan irqiy qirghinchiliqidin ibaret bu insanliq kirizisini “Siyasiy mesile” dep atiwalghan olimpik komitétining rusiyening ukra'inadiki tajawuzigha qayturghan inkasi otturisidiki perq ijtima'iy taratqulardimu küchluk inkas qozghidi. Tonulghan zhornalist mélissa chén tiwittérdiki inkasida “Tenterbiye siyaset bilen munasiwetsiz emesmidi, u halda xelq'ara olimpik komitéti meschitlerge buzghunchiliq qilish we bir milyon Uyghurni mexsus nishan qilip tutqun qilishni qobul qilidiken-de! ?” dep yazghan.