Olimpik komitéti musabiqe formilirini tikish üchün Uyghurlarning mejburiy emgikige chétishliq xitay shirketliri bilen toxtamlashqan

Muxbirimiz irade
2021-04-08
Share

Xelq'ara olimpik komitéti tokyo 2021-yilliq yazliq olimpik tenheriket musabiqisi we béyjing 2022-yilliq qishliq olimpik tenheriket musabiqisida kiyilidighan resmiy formlarni tikish üchün toxtam tüzgen xitay toqumichiliq shérkitining Uyghur élida tarmaq zawuti bolghan, yene kélip uning mejburiy emgek mehsulati ikenliki éniq békitilgen Uyghur éli paxtilirini ishlitishni ochuq-ashkara teshwiq qilghan shirket ikenliki aydinglashti.

Xelq'ara olimpik komitéti 2019-yili 9-ayda xitayning xényüenshyang (HYX) guruppisi bilen xelq'ara olimpik komitéti ezaliri we xizmetchilirini murasimda ishlitilidighan resmiy forma bilen teminlesh heqqide toxtamlashqanliqini élan qilghan idi.

Amérikadiki "Aksyus" (Axios) gézitining xewer qilishiche, mezkur shirketler guruhining xitay olimpik komitéti bilen uzun yilliq munasiwiti bar bolup, u 2008-yilliq béyjing olimpik tenheriket musabiqisining qollighuchisi bolghan. Xitayning tawbaw qatarliq tor tijaret supilirida bu shirket Uyghur élidin chiqqan paxtilar bilen yasalghan mehsulatlarni élan qilghan iken. Shirket tor bétide yene ularning zawutliridin birining Uyghur élige jaylashqanliqi yézilghan iken.

Mezkur xewer élan qilin'ghandin kéyin ijtima'iy taratqularda zor inkas qozghidi. Amérikaning sabiq tashqiy ishlar ministiri mayk pompiyo tiwittérda buninggha inkas qayturup: "Amérikaliqlarni irqiy qirghinchiliq qiliwatqan xitaydiki qullar yasighan olimpik formlirini kiyishke mejburlash intayin éghir bir ehwal," dep yazghan idi.

Amérikadiki emgek hoquqi guruppisi tetqiqat merkizining dériktori pénélop kiritis "Axios" gézitige qilghan sözide "Olimpik tenheriket musabiqisining Uyghur rayonida ishlepchiqirish élip baridighan, hetta buning bilen maxtinidighan shirketler bilen munasiwiti bolmasliqi kérek. Bu eyiblinishi kérek," dégen. U yene "Dunya Uyghur rayonida yolgha qoyuluwatqan dehshetlerni tonuwatqan bir peytte, xelq'ara olimpik komitéti qarighu bolup qalghandek qilidu," dégen.

Halbuki, xelq'ara olimpik komitétining bayanatchisi "Axios" gha qayturghan jawabida yuqiriqi xitay goruhini xelq'ara olimpik komitétigha olimpik formisi ishlepchiqirishta ishlitilidighan paxtining menbesining chet eldin kirgüzülgenliki heqqide ispat bilen teminlidi, dégen. Biraq ular bu guwahnamining kim teripidin teminlen'genliki heqqide éniq melumat bermigen, guwahnaminimu körsetmigen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet