Хитай һөкүмити әгәр америка бейҗиң олимпик мусабиқисини бойқут қилса өзлириниң күчлүк инкас қайтуридиғанлиқини пәш қилған

Мухбиримиз ирадә
2021-04-08
Share

Хитай ташқий ишлар министерлиқиниң баянатчиси җавлиҗйән американи хитай саһибханлиқ қилидиған 2022-йиллиқ қишлиқ олимпик мусабиқисини бойқут қилмаслиққа агаһландурған.

Йеқинда американиң шерик дөләтләр билән қишлиқ олимпик мусабиқисини бойқут қилишни сөзлишиватқанлиқи һәққидә хәвәрләр чиққандин кейин, ақсарайниң баянатчиси җен псаки 7-април күнидики баянатида буни рәт қилған иди. У: "биз иттипақдашлар вә шерикләр билән болған һәр қандақ бирләшмә байқутни музакирә қилмидуқ вә музакирә қилмаймиз," дегән.

Бирақ хитай буниңға қаримай американи агаһландуруп, әгәр америка хитайда өткүзүлмәкчи болған қишлиқ олимпикини байқут қилса, буниңға "интайин күчлүк" инкас қайтуридиғанлиқини билдүргән.

Хтиай ташқий ишлар министерлиқиниң баянатчиси җав лиҗйән шу күнки баянатида йәнә уйғурларға қиливатқан зиянкәшликиниму рәт қилған вә "тәнтәрбийәни сиясийлаштуруш олимпик низамнамисиниң роһиға һәмдә һәр қайси дөләттики тәнһәрикәтчиләрниң мәнпәәтигә зиян салиду. Америка олимпик комитетини өз ичигә алған хәлқара җәмийәтму буни қобул қилмайду," дегән.

Америка бирләшмә агентлиқиниң хәвәр қилишичә, америка олимпик вә мейиплар олимпик комитети илгири өзлириниң бу мусабиқини байқут қилишқа қарши туридиғанлиқини билдүргән икән. Америка олимпик вә мейиплар олимпик комитети мудирийитиниң рәиси сусан лийонс бу һәқтики сөзидә олимпик тәнһәрикәтчилириниң байқут қилишиниң мәсилини һәл қилалмаслиқ билән биргә, тәнһәрикәтчиләргә пассп тәсир көрситидиғанлиқини илгири сүргән. Сусан лйонс йәнә "хитайда йүз бериватқан еғир кишилик һоқуқ мәсилисигә сәл қарашқа болмисиму, әмма бундақ мәсилиләрни яш тәнһәрикәтчиләр әмәс, бәлки дипломатлар вә сода вә башқа һөкүмәт әмәлдарлири яхши һәл қилалайду, дәп қарайдиғанлиқини" билдүргән.

Һалбуки, тәтқиқатчи адриян зенз бүгүн тивиттер арқилиқ бу көз қарашқа инкас қайтуруп: "байқут қилиштик мәқсәт хитайниң сияситини өзгәртиш әмәс, бәлки тоғра болғанни қилиштур," дегән.

Чәт әлләрдики нурғун кишилик һоқуқ органлири вә кишиләр уйғурларға ирқий қирғинчилиқ йүргүзүватқан һакимийәтниң "иттипақлиқ, достлуқ вә бирлик" ниң симовли болған олимпик өткүзүшини зор хаталиқ, дәп қарап, әйни вақитта натсестлар һакимийииниң олимпик өткүзүшигә рухсәт беришـтәк тарихий хаталиқниң тәкрарлинишиға йол қоймаслиқни тәләп қилишмақта.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт