Xitay oqughuchilargha amérikaning oqush wizisini bérishni bikar qilishqa da'ir qanun layihesi teyyarlanmaqta

Amérika awam palatasining jumhuriyetchi ezaliri xitay oqughuchilirining amérikagha oqushqa kélishini chekleydighan qanun chiqirish üchün heriket bashlighan.

Foks xewerliri torining bildürüshiche, jumhuriyetchi awam palata ezasi réyliy mor (Riley Moore) bu ishqa yétekchilik qilghan bolup, u xitay hökümitining amérikaning oqush wizisini suyi'istémal qiliwatqanliqini, amérikaning eqliy mülük bixeterlikini kapaletke ige qilishning zörürlükini tekitligen.

Mor bu heqtiki bayanatida: “Biz her yili 300 minggha yéqin xitay puqrasining amérikigha oqughuchi wizisi bilen kélishige yol qoyuwatimiz. Mundaqche éytqanda, biz xitay kompartiyesini armiyemiz üstidin jasusluq qilishqa, eqliy mülük hoquqimizni oghrilashqa we dölet bixeterlikimizge tehdit sélishqa teklip qiliwatimiz” dégen.

U yene mundaq dégen: “Téxi ötken yili, amérika fédératsiye tekshürüsh idarisi amérikada oqughuchi wizisi bilen turuwatqan 5 neper xitayni amérika bilen teywenning birleshme herbiy manéwirini süretke éliwatqanda qolgha chüshürdi. Biz emdi buning dawamlishishigha yol qoyalmaymiz. Xitay puqraliqidiki barliq oqughuchilargha amérikaning oqush wizisini bérishni derhal chekleydighan peyt keldi”.

Awam palata ezasi réyliy morning xitay oqughuchilirini amérikada oqushtin chekleshni meqset qilghan “Xitay kompartiyesige wiza bérishni toxtitish qararnamisi” ning 14-mart küni awam palatada resmiy tonushturidighanliqi melum. U amérika dölet mejlisini derhal heriketke ötüshke chaqirmaqta iken.