Xitay jenub hawa yolliri Uyghur élida adem orgini yötkeydighan “Yéshil hawa yoli” tesis qilghan

Muxbirimiz erkin
2017.10.09
Share on WhatsApp
Share on WhatsApp

Igilinishiche, xitay jenub hawa yolliri shirkitining Uyghur rayoni tarmiqi adem ichki ezalirini xitay ölkilirige téz sür'ette yötkeydighan “Yéshil hawa yoli” tesis qilghan.

Jenub hawa yollirining yéqinda élan qilghan bir teshwiqat doklatida ashkarilishiche, “Yéshil hawa yoli” 2016‏-yili tesis qilin'ghandin buyan 500 qétimdin artuq ademlerning ichki organini yötkigen.

Xewerde xitayning jéngju shehiridiki shyéxé doxturxanisining “Yéshil hawa yoli” arqiliq adem ichki ezalirini yötkeydighan nishanliq doxturxanilarning biri ikenliki bildürülgen. Bu xewer, xelq'aradiki teshkilatlar we pa'aliyetchiler, xitaydiki sot, teptish, saqchi, edliye organlirining bezi doxturxanilar bilen birliship, falun'gongchilar, Uyghurlar we ölümge höküm qilin'ghan mehbuslarning ichki ezalirini köchürüp pul tépiwatqanliqigha da'ir xewerler arqa-arqidin élan qiliniwatqan bir mezgilde tarqaldi.

Ularning qarishiche, xitay sehiye ministirliqi xitayda her yili 10 ming ichki ezaning köchürülidighanliqini qeyt qilsimu, biraq emili san buningdin zor derijide éship chüshidiken. Amérikidiki kishilik hoquq pa'aliyetchisi étan gutman 2016‏-yili élan qilghan doklatida, xitayda her yili60 mingdin 100 mingghiche ichki eza köchürülidighanliqini ilgiri sürgen.

Jenub hawa yollirining teshwiqat doklatida körsitishiche, jenub hawa yollirining shinjang tarmiqi 2016‏-yili 7 ay ichide “Yéshil hawa yoli” arqiliq7 qétim adem ichki ezasi yötkesh wezipisini tamamlighan. Biraq jenub hawa yollirining teshwiqat doklatida bu ichki ezalirigha qandaq érishkenlikini chüshendürmigen.

Uyghur aptonom rayonida adem ichki ezalirini i'ane qilish tüzümi 2013‏-yildin bashlap yolgha qoyulghan. “Shinjang merkizi sheher géziti” ning yéqinda ashkarilishiche, Uyghur aptonom rayonida ichki eza i'ane qilish tüzümi yolgha qoyulghan 4 yil ichide aran 23 adem ichki ezasini i'ane qilghan iken.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.