Uyghur élide 12 kishi wuxen wirusi heqqide “Ösek söz tarqitish” bilen bir terep qilin'ghan

Xitay hökümitining “Wuxen wirusi” ni dunyadin yoshurush arqiliq kirizisni chongqurlashturghanliqi küchlük tenqid qozghawatqan bir peytte Uyghur rayon da'iriliri 4 nepiri Uyghurni öz ichige alghan jem'iy 12 kishini “Ösek söz tarqitish” bilen jazalighan.

Xitayning “Tengritagh tori” ning xewer qilishiche, yéqinda “Shinjang intérnét tori” uchur ishxanisi we shinjang Uyghur aptonom rayonluq j x nazariti qatarliqlar Uyghur élide yéngi tipliq tajsiman wirus heqqide “Ösek söz tarqitish” dégen jinayet bilen 12 kishini bir terep qilghan.

Xewerde bérilgen tizimliktin qarighanda, bu 12 kishining 4 nepiri Uyghur bolup, ular aqsu shehiri, xotunsumbul nahiyesi, aqtu nahiyesi we toqsu nahiyeliridin iken.

Xewerde yuqiridiki kishilerning wirusning tarqilishi we ölüm-yétim weqeliri heqqide asassiz sözlerni tarqitip, jem'iyet muqimliqigha ziyan bergenliki ilgiri sürülgen.

“Tengritagh tori” din melum bolushiche, Uyghur rayon da'iriliri 29-yanwar küni “Pütün aptonom rayonning yuqumning aldini élish-tizginlesh xizmitide pash qilish, melum qilishni qobul qilish toghrisidiki omumiy uqturush” ni tarqitip, qalaymiqan söz tarqitish qatarliq 4 xil heriketni melum qilishni yolgha qoyghan.

Uyghur rayon da'iriliri chiqarghan eng yéngi sanliq melumatqa asaslan'ghanda, Uyghur élide 29-yanwar küni sa'et 24 kiche bolghan ariliqta yene bir neper kishi “Wuxen wirusi” bilen yuqumlan'ghan buning bilen omumiy yuqumlan'ghuchi sani 14 neperge, késellik ehwali éghir kishi 3 neperge yetken. 492 Kishi késellik gumani bilen közitish astigha élin'ghan.