Азадлиқ радийоси: «оттура асиядики дөләтләр дуч кәлгән 4 чоң мәсилә»

Мухбиримиз әркин
2020-01-03
Елхәт
Пикир
Share
Принт

Йеқинда «азадлиқ» радийосиниң обзорчи брус пәнийерниң «2019‏-йили оттура асия дуч кәлгән 4 чоң мәсилә» намлиқ мақалиси елан қилинған.

Мақалидә тәкитлинишичә, оттура асиядики 5 дөләт хитай билән болған мунасивәтләрниң өзгириши, афғанистандин келидиған терорлуқ тәһдити, интернетни контрол қилиш вә йүз тонуш техникасини киргүзүш қатарлиқ 4 чоң мәсилигә дуч кәлгән. 

Мақалидә йәнә бу 4 чоң мәсилиниң райондики дөләтләрни давамлиқ тәқиб қилидиғанлиқи илгири сүрүлгән. Мақалидә қәйт қилинишичә, 2019‏-йили оттура асия җумһурийәтлириниң хитайға болған қаришида өзгириш болған бир йил икән. Мақалидә хитай билән болған мунасивәтләрдики өзгириш һәққидә тохтилип, буниңға хитайниң райондики дөләтләрни қәрзгә боғуп қоюши, хитай ишчилириниң көпләп еқип кирип, йәрликләрни әндишигә селиши шундақла униң уйғур аптоном районидики мусулманларға тутқан муамилиси қатарлиқ амилларниң һалқилиқ рол ойниғанлиқи тәкитләнгән. 

Мақалидә қәйт қилинишичә, нөвәттә қирғизистан омуми ташқий қәрзиниң аз кәм 50 пирсәнтини, таҗикистан омуми ташқий қәрзиниң 35 пирсәнтини хитайдин алған қәрз пул игиләйдикән. Мақалидә болупму хитайниң уйғур аптоном районидики мусулманларға тутқан муамилиси оттура асияда хитайға қарши кәйпиятни күчәйткәнлики, хитайниң бир милйондәк мусулманни йиғивелиш лагерлириға қамиши қазақ вә қирғиз һөкүмәтлирини осал әһвалға чүшүрүп қойғанлиқи илгири сүрүлгән. 

Мақалидә қәйт қилинишичә, оттура асиядики дөләтләр хитай билән болған мунасивәтлирини давамлиқ сақлап қелишни халисиму, лекин лагердин қоюп берилгән бир қисим қазақ вә қирғизларниң қазақистан вә қирғизистанға чиқип, лагерда йүз бәргән қорқунчлуқ хорлашларни ашкарилиши хитайға болған наразилиқни техиму күчәйтмәктә икән.

Пикирләр (0)
Share
Толуқ бәт