Rusiye tajikistan we özbékistan bilen bolghan herbiy hemkarliqlirini ashurmaqchi

Rusiye shangxey hemkarliq teshkilatigha eza shuningdek xitay bilen zich iqtisadiy we siyasiy munasiwetlerge ige tajikistan we özbékistan bilen bolghan herbiy hemkarliqlirini ashurushqa kirishken.

Rusiye bilen tajikistan dölet mudapi'e ministirliri 2017-yili ikki döletning herbiy hemkarliqlirini ashurushqa pütüshken bolup, rusiye 2017-yili, herbiy awi'atsiye küchi ajiz tajikistan'gha köp sandiki herbiy awi'atsiye téxnika esliheliri, jümlidin herbiy ayropilan we tik uchar ayropilanlarni bérishke maqul bolghan.

Perghane uchur torining xewer qilishiche, rusiye dölet mudapi'e ministiri sérgéy shoygu rusiyening tajikistanni zor sandiki qoral-yaraq, jümlidin herbiy ayropilan we tik uchar ayropilanlar bilen teminleydighanliqini, buning rayonning muqimliqini qoghdash üchün ikenlikini eskertken. U, yene rusiyening tajikistan armiyisining ofitsérliri we herbiy mutexessislirini moskwada terbiyileshni dawamlashturidighanliqini, hazirghiche, 1000din artuq mutexessisning terbiyilen'genlikini bildürgen.

Xewerde ilgiri sürülüshiche, rusiye mudapi'e ministirliqi bilen özbékistan mudapi'e ministirliqimu 2017-yilliq herbiy hemkarliq kélishim tüzgen bolup, özbékistan mudapi'e ministiri qobul berdiyéf rusiyening özbékistanning asasliq istratégiyilik shériki ikenlikini we özbékistanning rusiye bilen köp jehetlerdin baghlinishliq ikenlikini shuningdek özlirining rusiye bilen bolghan munasiwetlirini menggü buzmaydighanliqini bildürgen.

Mezkur kélishim özbékistan prézidénti islam kerimof wapatidin kéyin imzalan'ghan idi.

Rusiye terep özbékistan herbiy ofitsérliri we kursantlirini terbiyilesh xizmetlirini buningdin kéyin téximu kücheytidiken.