Ma shingruy “Ottura asiya iqtisadiy hemkarliq instituti” ni “Bir belbagh bir yol” qurulushining eqil ambiri bolushqa chaqirghan

 Xitay hökümiti bashqurushidiki “Shinjang géziti” ning 15-maydiki xewiride éytilishiche, Uyghur aptonom rayonluq partkomning sékrétari ma shingruy shu küni ürümchi shehiridiki “Ottura asiya rayoni iqtisadiy hemkarliq instituti” gha kélip tekshürüshte bolghan hemde oqutquchi-oqughuchilar bilen söhbetleshken.

 Xewerde éytilishiche, ma shingruy we Uyghur aptonom rayonining re'isi erkin tuniyaz, ottura asiya rayoni bilen xitay otturisidiki siyasiy, iqtisadiy we medeniyet alaqisini kücheytishning muhimliqini tekitlesh bilen birge, mezkur institutta oquwatqan oqughuchilardin nöwette ijra boluwatqan “Bir belbagh bir yol” qurulushining ongushluq dawam qilishigha, shuningdek xitay bilen ottura asiya döletliri otturisidiki iqtisadiy hemkarliq qurulushigha yéqindin küch chiqirishni telep qilghan.

 Melum bolushiche, bu xitay re'isi shi jinping bilen ottura asiya jumhuriyetlirining rehberliri mushu hepte xitayning shi'en shehiride kolléktip uchrishish aldida otturigha chiqqan bir meydan inkas, dep qaralmaqta.

 Xewerlerdin melum bolushiche, bu qétimqi xitay-ottura asiya dölet bashliqlirining shi'en uchrishishida, xitay bilen ottura asiya elliri otturisidiki siyasiy we iqtisad alaqilerning téximu kücheytilidighanliqi algha sürülmekte. Bolupmu xitay bilen gherb dunyasining iqtisadiy we siyasiy jehettiki yiriklishishi yuqiri pellige chiqiwatqanda, ottura asiya rayonining xitay üchün téximu zor qimmetke ige bolushi yenimu aydinglashmaqta iken. Ma shingruyning bu qétim ürümchidiki “Ottura asiya iqtisadiy hemkarliq instituti” da qilghan sözlirimu asasiy jehettin xitayning ottura asiyagha qaratqan yéngi istratégiyesini chöridigen mezmunlardin teshkil tapqan.

 Xitay taratquliridiki alaqidar uchurlardin melum bolushiche, “Ottura asiya rayoni iqtisadiy hemkarliq instituti” 2017-yili séntebirde ürümchi shehiride qurulghan. Pakistan, qirghizistan, özbékistan, xitay qatarliq 11 dölet eyni waqitta mezkur institutning qurulushi heqqide ortaq kélishimge imza qoyghan bolup, bu yéngi institutning “Bir belbagh bir yol” qurulushi üchün aktip rol oynaydighanliqini bildürülgen iken.