Aqsu shehiride öy chéqishqa naraziliq bildürgen acha - singil urup yarilandurulghan

Uyghurbiz torining xewiride déyilishiche, shu yer waqti 22 - aprél düshenbe küni etigende aqsu shehiridiki xalide we zulpiye isimlik acha - singil dadisidin miras qalghan turalghu öyi xitay shirketliri teripidin mejburiy chéqiwétilish weqesige naraziliq bildürüp qarshiliq körsetkini üchün, öy chéqishqa mes'ul bolghan xitay bashliqning buyruqi bilen urup yarilandurulghan.

Xewerde déyilishiche, weqeni körgüchi amma tor béketliride bu ehwalgha qarita naraziliq inkaslirini yézip, da'irilerning rayonda élip bériwatqan bu xil yolsizliqlirigha bolghan naraziliqini ipadiligen.

Radi'omiz igiligen bashqa uchurlardin melum bolushiche, nöwette Uyghur élining herqaysi wilayet, nahiyiliride Uyghurlarni öz mehelliliridin köchürüp tarqaqlashturush herikiti élip bériliwatqan bolup, naraziliq qilghanlar her xil zorawanliqlargha uchrighan.

13 - Aprél küni ürümchi polat zawutida rayonida olturushluq éli quddus chéqiwétilgen öyi üchün tölem telep qilghini üchün, öy chéqishqa qatnashqan xitay shirkitining shaykiliri teripidin urup yarilandurulghandin kéyin ürümchi shehiridiki 2 - doxturxanigha apirilghan idi.