"шәрқий түркистан хәлқара ойғиниш һәрикити" түркийә билән хитайниң җинайәтчиләрни өткүзүп бериш келишимигә қарши паалийәт башлиған

Мухбиримиз җәвлан
2020-12-30
Share

Түркийә билән хитайниң "җинайәтчиләрни өткүзүп бериш келишими" түркийә вә башқа дөләтләрдә яшаватқан уйғурларни қаттиқ әндишигә салғаниди.

"шәрқий түркистан хәлқара ойғиниш һәрикити" тәшкилати 29-декабир өзиниң тивиттер һесабида уқтуруш елан қилип, түркийә билән хитайниң "җинайәтчиләрни өткүзүп бериш келишими" гә қарши туруш үчүн, 30-декабир чүштин кейин түркийәниң вашингитондики әлчиханиси алдида намайиш өткүзидиғанлиқини җакарлиған. "түркийә билән хитай бу келишимнамисини бикар қилсун!", "уйғурларни өткүзүп бериш қатиллиқтур!" дегән шоар-чақириқлар тема қилинған бу намайиш, "җинайәтчиләрни өткүзүп бериш келишими" гә қарши түркийә һөкүмитигә берилгән күчлүк сигнал вә чақириқ болуп, түркийә вә башқа дөләтләрдики уйғурларму түркийә һөкүмитини бу қилмиштин ваз кечишкә үндәп, хитайниң һәммә йәргә созулған зиянкәшликигә қарши җамаәт бесими пәйда қилмақта икән.

Мәлуматларға қариғанда, мәзкур келишим мустәқиллиқ һәрикитигә қатнашқан уйғурларға түркийәдә панаһлиқ бәрмәслик вә уларни хитайға өткүзүп бериш дегәндәк мәзмунларни өз ичигә алған. Мусулманлар көп санлиқни тәшкил қилидиған мисир, сәуди әрәбистан қатарлиқ дөләтләрниң уйғурларни хитайға өткүзүп бәргәнлики, түркийәниңму зиннәтгул турсунни хитайға қайтурувәткәнлики қатарлиқ көплигән вәқәләр уйғурларни түркийәдиму хатирҗәм яшиялмайдиған қиливәткәчкә, улар өз һоқуқини қоғдаш үчүн түркийә хәлқи билән бирлишип, һөкүмәткә бесим пәйда қилиш үчүн тиришмақта икән.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт