Өзбек паалийәтчиләрниң әлихан төрини хатирилиши тосқунлуққа учриған

Мухбиримиз сада
2019.09.12
Share on WhatsApp
Share on WhatsApp

Йеқиндин буян елан қилинип келиватқан хәвәрләрдә өзбекистан һөкүмитиниң хитайниң уйғурларға қаратқан қаттиқ бастурушини қоллайдиғанлиқи һәққидә мәлуматлар елан қилинғаниди. Һалбуки 1-сентәбир өзбек кишилик һоқуқ паалийәтчисиниң уйғурларни қоллап һәрикәт қилиши диққәт қозғиған.

“дипломат” журнилиниң 11-сентәбир саниға бесилған мунасивәтлик хәвәрдин мәлум болушичә, өзбекистанлиқ тарихшунас, кишилик һоқуқ қоғдиғучиси әнвәр назиров өзиниң “фейсбук” бетидики әгәшкүчилири билән бирликтә өзбекистанниң мустәқиллиқ байрими болған 1-сентәбир күни ташкәнттики “гөкчә” қәбристанлиқиға йиғилип, 1944-1946-йиллиридики шәрқий түркистан җумһурийити рәһбири, өзбекләрдин келип чиққан елихан төрә вә миртәмиз мирабдуллайефни яд етишни пиланлиған. Вәһаләнки, бу паалийәт техи башланмай турупла булар сақчиларниң тосқунлуқиға учриған.

Хәвәрдә қәйт қилинишичә, сақчи тәрәп әнвәр назиров вә униң әгәшкүчилирини сақчиханиға чақиртқузуп, улардин уйғурларни қоллаш сәвәби, еһтияҗи һәмдә сиясәткә арилишиш муддиаси қатарлиқ бир қанчә түрлүк соалларни сориған.

19-Авғуст күни хитай ташқи ишлар министири ваң йи вә өзбекистанниң ташқи ишлар министири абдуләзиз камилоф сөһбәт өткүзгәниди. Бу җәрянда абдуләзиз камилоф хитайниң уйғур дияриға йүргүзүватқан аталмиш “әсәбийликниң алдини елиш” чарисини қоллайдиғанлиқини билдүргән.

Униңдин башқа хитайниң уйғурларға қолланған сияситини қоллап имза қойған 50 дөләтниң ичидә өзбекистанму бар иди. Мушундақ бир вәзийәт астида өзбекистанлиқларниң елихан төригә охшаш кишиләрни яд етиши көзәткүчиләрниң күчлүк диққитини қозғимақта.

Мәлум болушичә, елихан төрә 1944-йили қурулған 2-қетимлиқ “шәрқий түркистан җумһурийити” рәиси болуп сайланған. У хитайниң ишғалийитигә қарши күрәш қилған бир мусулман паалийәтчи икән.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.