Өзбекистанда дипломатийә ишлирида миллий тилни күчәйтиш тәшәббус қилинди

Мухбиримиз үмидвар
2018.01.14
Share on WhatsApp
Share on WhatsApp

Өзбекистанни 26 йил идарә қилған президент ислам кәримоф вапатидин кейин сайлам арқилиқ президентлиқ орниға чиққан шавкәт мирзайеф қисқиғина икки йилдин буян өзбекистанда бир қатар ислаһатларни елип бериватқанлиқи оттуриға чиқмақта.

Өзбекистанниң райондики вә хәлқарадики образини тикләшни давамлаштуруватқан шавкәт мирзияйеф нөвәттә йәнә ички ислаһатлар қатарида өзбек миллий кимлики вә вәтәнпәрвәрлик идийәсини күчәйтишкиму тиришиватқанлиқи мәлум болмақта.

Өзбекистан телевизийә хәвәрлиридин мәлум болушичә, президент шавкәт мирзияйеф өзбек тилини барлиқ һөкүмәт орунлиридин башқа йәнә дипломатийә саһәсидиму асаслиқ тил қилиш вә һәр қандақ дипломатийә хадими, чәтәлләрдики баш әлчиләрниң чоқум өзбек тилини мукәммәл билиши керәкликини тәләп қилған. У җәнуби корейәгә өзбек тилини мукәммәл билгән бир рус кишини баш әлчиликкә тәйинлигән. У: “маңа вәтәнни сөйгән адәм керәк, әлишир навайини билгән адәм керәк” дәп тәкитлигән.

Совет дәвридә рус тилиниң алаһидә салаһийити вә руслаштуруш сиясити түпәйлидин оттура асия җумһурийәтлиридә рус тиллиқ маарип вә рус тилиниң омумлишиши күчәйгән болуп, барлиқ һөкүмәт хизмәтлиридә пүтүнләй рус тили қоллинилған иди.

Қазақистан, қирғизистан, өзбекистан, таҗикистан вә түркмәнистан қатарлиқ оттура асия җумһурийәтлири мустәқил болғандин кейин, қәдәмму-қәдәм өз миллий тиллирини дөләт тили қилип бекитип, омумлаштурушқа киришкән болсиму, бирақ совет дәвридә рус тилида маарип тәрбийәси алған зор сандики оттура яштики кишиләр нөвәттә һакимийәт орунлирида ишләватқан болғачқа, мәзкур тилларниң һөкүмәт хизмәтлиридә ишлиниши раван болмиған иди.

Йеқинда қирғизистан һөкүмити болса барлиқ һөкүмәт хадимлириниң қирғиз тилини билиши, билмигәнләрниң чоқум өгиниши һәққидә қанун чиқарған. Қазақистанму бир қисим чариләрни қолланған иди.

Өзбек тили вә мәдәнийити түркий хәлқләр ичидә уйғурлар билән наһайити йеқин һесаблиниду. Шуңа, уйғурлар өзбекистандики бу әһвалларға йеқиндин диққәт қилмақта.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.