Özbékistanda diplomatiye ishlirida milliy tilni kücheytish teshebbus qilindi

Muxbirimiz ümidwar
2018.01.14
Share on WhatsApp
Share on WhatsApp

Özbékistanni 26 yil idare qilghan prézidént islam kerimof wapatidin kéyin saylam arqiliq prézidéntliq ornigha chiqqan shawket mirzayéf qisqighina ikki yildin buyan özbékistanda bir qatar islahatlarni élip bériwatqanliqi otturigha chiqmaqta.

Özbékistanning rayondiki we xelq'aradiki obrazini tikleshni dawamlashturuwatqan shawket mirziyayéf nöwette yene ichki islahatlar qatarida özbék milliy kimliki we wetenperwerlik idiyesini kücheytishkimu tirishiwatqanliqi melum bolmaqta.

Özbékistan téléwiziye xewerliridin melum bolushiche, prézidént shawket mirziyayéf özbék tilini barliq hökümet orunliridin bashqa yene diplomatiye sahesidimu asasliq til qilish we her qandaq diplomatiye xadimi, chet'ellerdiki bash elchilerning choqum özbék tilini mukemmel bilishi kéreklikini telep qilghan. U jenubi koréyege özbék tilini mukemmel bilgen bir rus kishini bash elchilikke teyinligen. U: “Manga wetenni söygen adem kérek, elishir nawayini bilgen adem kérek” dep tekitligen.

Sowét dewride rus tilining alahide salahiyiti we ruslashturush siyasiti tüpeylidin ottura asiya jumhuriyetliride rus tilliq ma'arip we rus tilining omumlishishi kücheygen bolup, barliq hökümet xizmetliride pütünley rus tili qollinilghan idi.

Qazaqistan, qirghizistan, özbékistan, tajikistan we türkmenistan qatarliq ottura asiya jumhuriyetliri musteqil bolghandin kéyin, qedemmu-qedem öz milliy tillirini dölet tili qilip békitip, omumlashturushqa kirishken bolsimu, biraq sowét dewride rus tilida ma'arip terbiyesi alghan zor sandiki ottura yashtiki kishiler nöwette hakimiyet orunlirida ishlewatqan bolghachqa, mezkur tillarning hökümet xizmetliride ishlinishi rawan bolmighan idi.

Yéqinda qirghizistan hökümiti bolsa barliq hökümet xadimlirining qirghiz tilini bilishi, bilmigenlerning choqum öginishi heqqide qanun chiqarghan. Qazaqistanmu bir qisim charilerni qollan'ghan idi.

Özbék tili we medeniyiti türkiy xelqler ichide Uyghurlar bilen nahayiti yéqin hésablinidu. Shunga, Uyghurlar özbékistandiki bu ehwallargha yéqindin diqqet qilmaqta.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.