Özbékistan prézidénti islam kerimofning qizi dadisining téxi ölmigenlikini bayan qildi

Méngisige qan chüshüsh bilen yekshenbe künidin étibaren doxturxanida yétip qalghan özbékistan prézidénti islam kerimofning qizi lola kerimowa charshenbe küni ijtima'iy taratqularda dadisining terepdarlirining salametlik tileklirige minnetdarliq bildürgen we buning netijiside dadisining téxi hayat ikenlikidin uchur bergen.

Kerimof doxturxanida yétip qalghandin bashlap ijtima'iy taratqularda bezide uning ölgenliki, bezide sekratta ikenliki heqqide uchur tarqilip turuwatqan, emma ishenchlik menbelerdin téxi bu heqte melumat bérilmigen idi.

Firansiye axbarat agéntliqining bügünki bu heqtiki, nöwettiki haliti axbarat dunyasining diqqitini tartiwatqan 78 yashliq kerimofning özbékistanni 25 yildin buyan tömür musht bilen bashqurup kéliwatqanliqi tilgha élin'ghan.

Kerimofning kariwattiki haliti Uyghurche ijtima'iy taratqulardimu muhim orun tutti. Féysbokta pikir bayan qilghan Uyghur közetküchiler kerimof dewride özbékistandiki Uyghurlarning siyasiy we medeniy heqlirining éghir derijide depsende bolghanliqini tilgha aldi we kanada wetendishi hüsenjan jélilning kerimof hakimiyiti teripidin xitaygha tapshurulghanliqini esleshti.