Мирзияйев билән әркин тунияз өзбекистан билән уйғур дияриниң нуқтилиқ саһәләрдики һәмкарлиқни күчәйтишни музакириләшти

Оттура асия җумһурийәтлиридә зиярәттә болуватқан уйғур аптоном районлуқ һөкүмәтниң рәиси әркин тунияз 28-март күни ташкәнттә өзбекистан президенти шавкәт мирзияйев(Shavkat Mirziyoyev) Билән көрүшүп, өзбекистан билән уйғур дияриниң муһим түрләрдики һәмкарлиқини йәниму күчәйтишни музакирә қилған.

Өзбекистан президент мәһкимисиниң баянатида, сөһбәтниң муһим түрләрдики һәмкарлиқни асаси нуқта қилғанлиқи, буниң өзбекистан билән уйғур дияри арисидики әмили алақини тәрәққий қилдурушни өз ичигә алғанлиқи қәйт қилинмақта. Әркин туниязниң оттура асия җумһурийәтлиридики зияритиниң 2-бекити өзбекистан болуп, у буниңдин бурун қазақистан пайтәхти астанидиму зиярәттә болған. Әркин тунияз 26-март астанада қазақистан президенти тоқайефниңму күтүвелишиға еришкән. Хитай таратқулириниң хәвәрлиридә, әркин туниязниң тоқайефқа қазақистанниң “үч хил күчләр” гә зәрбә бериштә хитайға һәмдәмдә болғанлиқиға рәһмәт ейтқанлиқи билдүрүлмәктә.

Һалбуки, мирзияйев билән әркин тунияз көрүшкәндә икки тәрәп “өзбекистан-хитай достлуқ вә истиратегийәлик шериклик мунасивәтлиридики һазирқи йүксәк тәрәққиятни зор мәмнунийәт билән қәйт қилишқан.” әркин туниязниң зиярити, йеқинқи бир-икки йилдин бери ‍оттура асия җумһурийәтлириниң уйғур дияри билән болған ташқий содиси шиддәтлик артип, бу дөләтләр хитайниң ғәрб дөләтлири тәрипидин русийәгә експорт қилиши чәкләнгән мәһсулатларни екиспорт қилишта васитичилик қилиш билән әйиблиниватқан, шуниңдәк хәлқарада хитайниң уйғур “ирқий қирғинчилиқи” ни җавабкарлиққа тартиш чуқанлири давамлишиватқан бир вақитта елип берилған.

Өзбекистан президент мәһкимисиниң баянатида көрситилишичә, мирзияйев ‍өзбекистанниң уйғур дияри билән болған көп хил һәмкарлиқ вә ортақ қурулуш түрлирини, болупму йеңи технологийә, йеза игилик, су-иншаат, қатнаш, арқа сәп тәминати, банкичилиқ, сәрмайә, маарип, әнәниви тебабәтчилик саһәлиридики һәмкарлиқни күчәйтишни тәкитлигән, шундақла өзбекистан-қирғизистан-хитай төмүр йоли қурулушини илгири сүрүшкә алаһидә әһмийәт беридиғанлиқини ейтқан.