Mirziyayéw bilen erkin tuniyaz özbékistan bilen Uyghur diyarining nuqtiliq sahelerdiki hemkarliqni kücheytishni muzakirileshti

Ottura asiya jumhuriyetliride ziyarette boluwatqan Uyghur aptonom rayonluq hökümetning re'isi erkin tuniyaz 28-mart küni tashkentte özbékistan prézidénti shawket mirziyayéw(Shavkat Mirziyoyev) Bilen körüshüp, özbékistan bilen Uyghur diyarining muhim türlerdiki hemkarliqini yenimu kücheytishni muzakire qilghan.

Özbékistan prézidént mehkimisining bayanatida, söhbetning muhim türlerdiki hemkarliqni asasi nuqta qilghanliqi, buning özbékistan bilen Uyghur diyari arisidiki emili alaqini tereqqiy qildurushni öz ichige alghanliqi qeyt qilinmaqta. Erkin tuniyazning ottura asiya jumhuriyetliridiki ziyaritining 2-békiti özbékistan bolup, u buningdin burun qazaqistan paytexti astanidimu ziyarette bolghan. Erkin tuniyaz 26-mart astanada qazaqistan prézidénti toqayéfningmu kütüwélishigha érishken. Xitay taratqulirining xewerliride, erkin tuniyazning toqayéfqa qazaqistanning “Üch xil küchler” ge zerbe bérishte xitaygha hemdemde bolghanliqigha rehmet éytqanliqi bildürülmekte.

Halbuki, mirziyayéw bilen erkin tuniyaz körüshkende ikki terep “Özbékistan-xitay dostluq we istiratégiyelik shériklik munasiwetliridiki hazirqi yüksek tereqqiyatni zor memnuniyet bilen qeyt qilishqan.” erkin tuniyazning ziyariti, yéqinqi bir-ikki yildin béri ‍ottura asiya jumhuriyetlirining Uyghur diyari bilen bolghan tashqiy sodisi shiddetlik artip, bu döletler xitayning gherb döletliri teripidin rusiyege éksport qilishi cheklen'gen mehsulatlarni ékisport qilishta wasitichilik qilish bilen eyibliniwatqan, shuningdek xelq'arada xitayning Uyghur “Irqiy qirghinchiliqi” ni jawabkarliqqa tartish chuqanliri dawamlishiwatqan bir waqitta élip bérilghan.

Özbékistan prézidént mehkimisining bayanatida körsitilishiche, mirziyayéw ‍özbékistanning Uyghur diyari bilen bolghan köp xil hemkarliq we ortaq qurulush türlirini, bolupmu yéngi téxnologiye, yéza igilik, su-insha'at, qatnash, arqa sep teminati, bankichiliq, sermaye, ma'arip, en'eniwi tébabetchilik saheliridiki hemkarliqni kücheytishni tekitligen, shundaqla özbékistan-qirghizistan-xitay tömür yoli qurulushini ilgiri sürüshke alahide ehmiyet béridighanliqini éytqan.