Хитайниң өзбекистан билән болған алақиси күчәймәктә

Вашингтондин мухбиримиз әзиз тәйярлиди
2024.06.11

Хитай башқурушидики “хәлқ тори” ниң 11-июндики хәвиридә ейтилишичә, уйғур аптоном райониниң рәиси әркин туняз зиярәт үчүн үрүмчи шәһиригә кәлгән өзбекистан җиззах вилайитиниң валиси салийев башчилиқидики өмәк әзалири билән көрүшкән.

Хәвәрдә ейтилишичә, икки тәрәпниң сөһбити җәрянида әркин туняз, “биз һазир баш секретар ши җинпиңниң мустәһкәм рәһбәрликидә партийәмизниң йеңи дәврдики шинҗаңни идарә қилиш истратегийәсини толуқ вә омумйүзлүк иҗра қиливатимиз” дегән. Шуниңдәк уйғур дияриниң пүткүл хитайниң тәрәққият механизмидики истратегийәлик орниға қилчиму сәл қарашқа болмайдиғанлиқини, шуңа өзбекистан билән хитай оттурисидики бу хил достлуқ мунасивитиниң истиқбали бәкму зор икәнликини тәкитлигән.

Әркин туняз тилға алған “йеңи дәврдики шинҗаңни идарә қилиш истратегийәси” уйғур қирғинчилиқи асасида уйғур диярини исми-җисмиға лайиқ хитай өлкисигә айландуруш урунуши, дәп қариливатқан болуп, дәл мушу сәвәбтин америка вә бир қисим явропа дөләтлири хитайға қарита охшаш болмиған иқтисадий җаза тәдбирлирини ишқа салған иди. Хитайму буниңға мас һалда иш көрүп, иқтисадий тәсирини оттура асия арқилиқ ғәрбкә кеңәйтиш истратегийәсини иҗра қилишқа башлиған. Нәтиҗидә уйғур дияри бу истратегийәни йолға қоюштики мәркизий районлардин болуп қалған. Шуниңдәк хитай-өзбекистан мунасивитидики бир қатар муһим учришишлар вуҗудқа чиққан иди.

“бастил почтиси” гезитиниң 9-июндики хәвиридә ейтилишичә, 2024-йилиниң алдинқи йерим йилида қорғас еғизи вә алатав порти арқилиқ оттура асияға йолға селинған йүк пойизлири 6400 қетимдин ашқан болуп, хитайниң явропа билән болған сода алақисидә ачқучлуқ рол ойнашқа башлиған.

Мәлум болушичә, җиззах вилайити өзбекистандики 12 вилайәтниң бири болуп, вилайәтниң омуми нопуси 910 миң икән. Җиззах вилайити өзбекистанниң қазақистан вә таҗикистан билән чегралинидиған җайида болуп, истратегийәлик орни наһайити муһим, дәп қарилиду.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.