Özbékistan prézidéntidin Uyghur élidiki lagérlarda yétiwatqan özbéklerni sürüshte qilish telep qilindi

Muxbirimiz irade
2018-12-05
Élxet
Pikir
Share
Print

Uyghur élide yolgha qoyuluwatqan lagérlarning ottura asiya türkiy jumhuriyetliridimu oyghinish peyda qiliwatqanliqi melum. Amérika awazi radiyosi özbék bölümining xewiridin qarighanda, yéqinda bir qisim özbék zhurnalist we pa'aliyetchiler Uyghur élide yolgha qoyuluwatqan lagérlar mesilisi heqqide özbékistan prézidénti shawket mirziyayéfqa bir muraji'etname yollighan.

Uyghur élide yolgha qoyuluwatqan qayta terbiye lagérlirida milyonlighan Uyghur, qazaq we qirghiz bilen birlikte özbéklerningmu tutup turuluwatqanliqi tilgha élin'ghan bu muraji'etnamide qazaqistan we qirghizistan hökümetliri xitay hökümiti bilen alaqiliship, öz milletdashliri üstidiki bésimini sürüshtürgenliki we uni toxtitishni telep qilghanliqi, shunga özbékistan hökümitiningmu lagérlardiki özbéklerni sürüshte qilishi kérekliki bayan qilin'ghan.

Yuqiridiki bu özbék zhurnalist we pa'aliyetchiler muraji'etnamiside, Uyghur élidiki lagérlarda hazir minglighan özbék barliqi heqqide xewerler barliqini ilgiri sürgen.

Yuqiridiki bu muraji'etnamige imza qoyghuchilarning biri bolghan özbék ziyaliysi enwer nazir "Amérika awazi" gha qilghan sözide hazir shewket mirziyayéf hökümitidin xitayda yashaydighan özbéklerning teqdiri üstide xitay hökümiti bilen muzakire ötküzüshini kütüsh qiyin bolsimu, emma mushundaq bir mesile barliqidin özbék jama'etchilikining xewiri bolushining intayin muhimliqini tekitligen. U sözide "Biz peqet sherqiy türkistandiki Uyghur mesilisini kötürüpla qalmay, belki u yerdiki özbéklerning mesilisigimu diqqet qiliwatimiz. Sherqiy türkistanda xéli köp özbékler yashaydu. Emma jama'etchilikning ularning ehwalidin xewiri yoq" dégen.

Melum bolushiche, Uyghur élide yolgha qoyuluwatqan lagér tüzümining ziyankeshlikige Uyghurlardin bashqa yene qazaq, qirghiz we özbék qatarliq türkiy milletlermu oxshash uchrawatqan bolup, ularning weziyiti nöwette qazaqistan, qirghizistan qatarliq ottura asiya türkiy döletliridiki jama'et arisidimu inkas qozghimaqta hem bu heqtiki maqale we xewerlermu barghanséri köpeymekte iken.

Toluq bet