Pakistan bash ministiri imranxan: biz shinjang mesiliside xitayni qollaymiz

Muxbirimiz irade
2021-07-02
Share

Xitay hökümitining Uyghurlargha qaritiwatqan irqiy qirghinchiliqini körmeske séliwalghanliqtin küchlük tenqidke duch kéliwatqan pakistan bash ministiri imranxan xitay kompartiyesi qurulushining 100 yilliqi we ikki döletning diplomatik munasiwet ornatqanliqining 70 yilliqi munasiwiti bilen xitaygha "Köngül izhar qilghan".

Imran xan xitayning teshwiqat awazi bolghan "Yershari waqti géziti" ge teqdim qilghan imzaliq mektubida töwendikidek sözlerni qilghan:

"Xelqimiz otturisidiki uzun yilliq munasiwet qedimki yipek yoligha tutishidu, eyni waqitta fa shyen we shüen zanggha oxshash teriqetchiler, sodigerler, ilim ehliliri qaraqurum téghini késip ötüp, xitay medeniyiti bilen hindi wadisi medeniyiti otturisidiki paydiliq öz-ara almashturushning asasini tikligen".

Uningda yene munular déyilgen: "Pakistan-xitay munasiwiti chongqur öz-ara ishinish, chüshinish we menpe'et ortaqliqi bilen xaraktérlinidu. U waqitning siniqidin ötken, tömür qérindashliq. Biz özimizning yadroluq menpe'etimiz üchün bir-birimizni qollaymiz. Pakistan ezeldin 'bir xitay siyasiti' ni qollap keldi hemde teywen, tibet, shinjang, xongkong we jenubiy déngiz mesiliside xitayni qollaydu. . . Pakistan xelqi we hökümiti xitayning keshmir talash-tartishidiki adil we prinsipal meydanini chongqur qedirleydu".

Xitay kompartiyesi qurulushining 100 yilliq xatire mezgilide gherbtiki démokratik döletliride uning bu 100 yilda öz xelqige élip kelgen paji'eliri heqqidiki tenqidler kücheygenning eksiche, pakistan bash ministiri imranxanning medhiye mektubi élan qilishi diqqet qozghidi.

Pakistanning bash ministiri imran xan yéqinqi bir mezgillergiche xelq'araliq axbaratlarning xitayning Uyghur musulmanlirigha irqiy qirghinchiliq yürgüzüwatqanliqi heqqidiki so'allirigha duch kelgende bu ehwaldin xewiri yoqluqini ilgiri sürüp kelgen. Biraq u xelq'aradiki muxbirlarning toxtimay so'al sorishi netijiside axiri özining bu ishtin xewiri barliqini étirap qilghan bolsimu, biraq xitayni eyiblimeydighanliqini, chünki xitayning pakistanning yéqin dosti ikenlikini éytqan. "Tashqi siyaset" zhurnili mushu heqte élan qilghan bir maqaliside "Pakistan bash ministiri imranxanning Uyghur mesiliside sükütte turuwélishi uninggha musulmanlar dunyasida gep qilidighan yüz qoymidi" dep yazghan.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet