Pakistan bash ministiri imran xan xitayning Uyghurlarni basturushigha yene köz yumuwaldi

Muxbirimiz erkin
2021-06-21
Share

Pakistan bash ministiri imran xan amérikadiki "‍Oksi'os" torining ziyaritini qobul qilghanda, xitayning Uyghurlarni basturghanliqini étirap qilishni qayta-qayta ret qilghan. U dunyaning bash jayliridiki kishilik hoquq mesililirini tilgha alghan shundaqla "Xitayning shinjangda basturush élip barghanliqini ret qilghanliqi" ni bildürgen. "Oksi'os" imran xanni ötken hepte ziyaret qilghan bolup, ziyaret xatirisi 20-iyun élan qilin'ghanidi.

Bu qétimqi ziyarette "Oksi'os" ning muxbiri jonatan swan imran xandin néme ‍üchün Uyghurlar mesilisige süküt qilidighanliqini qayta-qayta sorighan bolsimu, biraq u yenila xitayning shinjangda basturush élip barghanliqini ret qilghanliqini tekrarlap turuwalghan. U xitay bilen herqandaq mesile bolsa yépiq sözlishidighanliqi, xitayning özlirige qiyin ehwalda qalghanda yardem qilghanliqi, shunga ulargha hörmet qilidighanliqini bildürgen.

Imran xan "Xitayning puli üchün süküt qilishqa mejbur bolushi uni bizar qilghan-qilmighanliqi" heqqidiki so'algha: "Men dunyada pelestin, liwiye, somali, süriye, afghanistanda néme ishlarning bolghanliqigha qarap keldim. Men hemme ish heqqide sözlishim kérekmu? men méning chégramda, méning dölitimde néme boluwatidu? diqqitimizni shuninggha merkezleshtürimen" dégen.

Bu, gherbni izchil "Islamifobiye" yaki "Islam düshmenliki" bilen eyiblep kelgen imran xanning xitayning ‍uyghurlarni basturghanliqini étirap qilishtin tunji qétim ‍özini qachurushi emes. U burunmu bu heqtiki so'allargha jawab bérishtin özini qachurghanidi.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.

Toluq bet