Pakistanning karachi ayrodurumi etrapidiki partlashta ikki xitay puqrasi ölgen

5-Öktebir yekshenbe küni pakistanning karachi ayrodurumi etrapida yüz bergen, adem bomba hujumi bolushi mumkinliki guman qiliniwatqan bir partlashta, ikki xitay puqrasi ölgen, az dégende on adem yarilan'ghan.

BBC Ning xewer qilishiche, partlashta ölgüchiler üch adem bolsimu, üchinchi kishining hujumchi bolushi mumkinliki perez qilinmaqta iken. Halbuki, pakistanning baluchistan ölkisidiki musteqilliq terepdarliridin “Baluchistan azadliq armiyesi” hujumni özlirining élip barghanliqini ilgiri sürgen.

Qeshqer bilen gwadar arisidiki xitay-pakistan iqtisadi karidorining déngizgha chiqish éghizi bolghan gwadar porti, baluchistan ölkisige jaylashqan. Halbuki, “Baluchistan azadliq armiyesi” yéqinqi yillardin béri özining hujum nishanlirini pakistan-xitay iqtisadi karidori qurulushi qatnishiwatqan xitay puqralirigha we shirketlirige qaritip kelgenidi.

Bu qétimliq hujum pakistan ichki ishlar ministiri mohsin neqwi bilen xitay merkizi siyasiy-qanun komitétining sékrétari chén min'goning ötken ay islam'abadta körüshüp, térrorluqqa qarshi turush, chégra bashqurush qatarliq jehetlerde hemkarliqni kücheytishke kélishishining arqisidinla yüz bergen. Pakistan taratqulirining xewerliridin, ikki terepning atalmish “Shinjang mesilisi” ni muzakire qilghanliqi, shundaqla gilgit-baluchistan we Uyghur élide qoralliq saqchi qisimlirining birleshme manéwirlirini élip bérishqa pütüshkenliki melum bolghanidi.

BBC Ning bildürüshiche, xitayning pakistanda turushluq elchixanisi 5-öktebir kechte yüz bergen partlashning sindi ölkisidiki qurulush türige qatnishiwatqan xitay inzhénérlirini nishan qilghan “Térrorluq hujum” ikenlikini ilgiri sürgen. Halbuki, “Baluchistan azadliq armiyesi” 6-öktebir élan qilghan bayanatida, “Hujumning karachi ayrodurumidin kéliwatqan yuqiri derijilik xitay inzhénérliri we meblegh salghuchilirini nishan qilghanliqi” bildürgen. Bayanatta qeyt qilinishiche, bu hujum “Baluchistan azadliq armiyesi” ning “Mejid brigadasi” diki shah fahad isimlik jengchi teripidin élip bérilghaniken. Bayanatta, hujumning “Aptomobilgha qachilan'ghan partlatquch bilen élip bérilghanliqi” tekitlen'gen.