Арсалан иптихар: “пакистан вә сәуди әрәбистан уйғурларни отқа иттәрмәктә!”

Сәуди әрәбистан вәлиәһдиси муһәммәд бин салман йеқинқи хитай зияритидә хитай һөкүмитиниң аталмиш “террорлуқ вә әсәбийликкә қарши күрәш қилиши” ни қоллайдиғанлиқини билдүргәндин кейин, һәр саһә затлириниң күчлүк тәнқидигә учриди.

Пакистанлиқ әвладидин болған инсан һәқлири паалийәтчиси вә обзорчи арсалан иптихар вашингтон шәһиридики җорҗитавн университети нәшр қиливатқан “көврүк” журнилида мәхсус мақалә елан қилип, сәуди әрәбистан вә пакистан һөкүмәтлириниң уйғурлар дуч келиватқан паҗиәләрни көрмәскә селивелишини “уйғурларни отқа иттәргәнлик” дәп әйиблиди.

Аптор мақалисидә ислам динидики әң муқәддәс икки һәрәм җайлашқан сәуди әрәбистан вә 200 милйонлуқ мусулманлар нопусиға игә пакистанниң мусулманлар дунясида символлуқ мәмликәтләр һесаблинидиғанлиқини, һалбуки мушу икки мәмликәт һөкүмәтлириниң хитай һөкүмити иҗра қиливатқан ислам диниға қарши ирқий тазилаш һәрикитини, шуниңдәк милйонлиған уйғурниң ислам етиқади сәвәблик җаза лагерлириға қамилишидәк реаллиқни әйибләшни рәт қилғанлиқини “пүтүн дуняни һәйрәттә қалдуридиған иш” дәп тәнқидлиди.

Арсаланниң мақалисидә уйғурлар милйонлап қамаққа елиниватқан, уйғурлар өзлириниң әнәниви ислам етиқадидин ваз кечип чошқа гөши йейишкә мәҗбурлиниватқан, хәлқара җамаәт уйғурлар дуч келиватқан паҗиәләрни “ирқий тазилаш” дәп йәкүн чиқириватқан әһвалда ислам дунясидики ғоллуқ шәхсләр болған муһәммәд бин салман вә пакистанниң баш министири имран ханниң бу мәсилиләргә қулақ йопурувелишини “адәмни шүркәндүрүветиду” дәйду. Шуниңдәк буниңда хитай һөкүмити билән болған иқтисадий мунасивәтниң һәммидин үстүн келиватқанлиқини алаһидә әскәртиду.