Arsalan iptixar: “Pakistan we se'udi erebistan Uyghurlarni otqa ittermekte!”

• Muxbirimiz eziz
  2019-03-06

Se'udi erebistan weli'ehdisi muhemmed bin salman yéqinqi xitay ziyaritide xitay hökümitining atalmish “Térrorluq we esebiylikke qarshi küresh qilishi” ni qollaydighanliqini bildürgendin kéyin, her sahe zatlirining küchlük tenqidige uchridi.

Pakistanliq ewladidin bolghan insan heqliri pa'aliyetchisi we obzorchi arsalan iptixar washin'gton shehiridiki jorjitawn uniwérsitéti neshr qiliwatqan “Köwrük” zhurnilida mexsus maqale élan qilip, se'udi erebistan we pakistan hökümetlirining Uyghurlar duch kéliwatqan paji'elerni körmeske séliwélishini “Uyghurlarni otqa ittergenlik” dep eyiblidi.

Aptor maqaliside islam dinidiki eng muqeddes ikki herem jaylashqan se'udi erebistan we 200 milyonluq musulmanlar nopusigha ige pakistanning musulmanlar dunyasida simwolluq memliketler hésablinidighanliqini, halbuki mushu ikki memliket hökümetlirining xitay hökümiti ijra qiliwatqan islam dinigha qarshi irqiy tazilash herikitini, shuningdek milyonlighan Uyghurning islam étiqadi seweblik jaza lagérlirigha qamilishidek ré'alliqni eyibleshni ret qilghanliqini “Pütün dunyani heyrette qalduridighan ish” dep tenqidlidi.

Arsalanning maqaliside Uyghurlar milyonlap qamaqqa éliniwatqan, Uyghurlar özlirining en'eniwi islam étiqadidin waz kéchip choshqa göshi yéyishke mejburliniwatqan, xelq'ara jama'et Uyghurlar duch kéliwatqan paji'elerni “Irqiy tazilash” dep yekün chiqiriwatqan ehwalda islam dunyasidiki gholluq shexsler bolghan muhemmed bin salman we pakistanning bash ministiri imran xanning bu mesililerge qulaq yopuruwélishini “Ademni shürkendürüwétidu” deydu. Shuningdek buningda xitay hökümiti bilen bolghan iqtisadiy munasiwetning hemmidin üstün kéliwatqanliqini alahide eskertidu.