Pakistan armiyesining shtab bashliqi Uyghur qoralliq küchlirini basturushqa wede bergen

Pakistan armiyesining bash shtab bashliqi général rahil sherif charshenbe küni Uyghur élida bir kün ziyarette bolup, Uyghur qoralliq küchlirige qaritilghan basturushni kücheytishke wede bergen.

Hindistandin chiqidighan “Hindistan ékspres” gézitining xewer qilishiche, sherif ziyariti jeryanida Uyghur rayoni partkom sékrétari jang chünshen we xitay armiyesining bash shtab bashliqi fang féngxuy bilen körüshken.

Xewerde pakistan mushterek istixbarat idarisi axbarat ishxanisi bu heqte tarqatqan bayanattin neqil élip xewer qilishiche, söhbet jeryanida bu ikki général ikki terep herbiy munasiwetliri, ikki terep xewpsizlik hemkarliqi, xitay-pakistan iqtisadiy karidorining bixeterliki qatarliqlarni sözleshken.

Général sherif xitay générali fanggha elqa'ide teshkilatigha chétilghan sherqiy türkistan islam herikitini qattiq basturidighanliqi heqqide wede bergen.

Pakistan xitayning eng chong iqtisadiy we xewpsizlik shérikliridin biri. Ular öz munasiwetlirini “Heseldinmu shérin” we “Polattinmu mustehkem” dep teriplep kelmekte.

Xitay da'iriliri ötken yili pakistan'gha 46 milyard dollar meblegh salidighanliqini ashkarilighan we buning qeshqerni pakistanning gwadar portigha tutashturidighan qatnash we néfit turuba liniyesini öz ichige alidighanliqi körsitilgen idi.

Ilgiri xitay da'iriliri Uyghur élida yüz bergen qarshiliq heriketlirining pakistanning qebile rayoni weziristanda heriket qilidighanliqi ilgiri sürülgen “Sherqiy türkistan islam herikiti” teshkilati bilen munasiwetlik ikenlikini bildürüp pakistandin bu Uyghurlarni basturushni telep qilghan.

2015- Yili séntebirde xitayda ziyarette bolghan pakistan prézidéntni memnun hüseyin xitay prézidéntni shi jinping bilen körüshkende qebile rayonidiki Uyghur qoralliq küchlirining “Tamamen dégüdek yoqitilghanliqi” ni éytqan idi.
Nöwette pakistanda rayonida yene qanchilik Uyghur qoralliq küchlirining mewjutluqi melum emes.