Пакистан баш министири имранхан йәнә бир қетим уйғур мәсилисидин хәвири йоқлуқини билдүрди

Мухбиримиз әркин
2019-09-16
Елхәт
Пикир
Share
Принт

Пакистан баш министири имран хан, уйғур мәсилисидә «икки хил өлчәм» қоллинип, хитайниң уйғурларға тутқан муамилисигә «көз юмуш» билән әйипләнмәктә.

Имран хан йеқинда қатардики әлҗәзирә телевизийә қанилиниң зияритини қобул қилғанда йәнә бир қетим өзиниң уйғур мәсилиси һәққидә көп нәрсә билмәйдиғанлиқини билдүргән. Һалбуки, пакистан техи йеқиндила ислам әллирини өз ичигә алған 37 дөләтниң б д т ға тапшурған мәктубиға имза қоюп, хитайниң уйғурларға тутқан сияситини қоллайдиғанлиқини билдүргән иди.

Әлҗәзирә телевизийә қанилиниң 14‏-сентәбир күни тартқан зиярәт программисида, имран хан мәзкур телевизийә қанили мухбириниң ши җинпиң билән уйғур мәсилисини һеч музакирә қилип баққан яки бақмиғанлиқи һәққидики соалиға, өзиниң бу мәсилә һәққидә көп нәрсә билмәйдиғанлиқи, бейҗиңниң исламабадниң «әң яхши дости» икәнликини тәкитлигән. У «яқ, мән ундақ қилип бақмидим. Һазир бизниң өзимизниң нурғун ички мәсилимиз бар. Шуңа, бу мәсилә һәққидә көп нәрсә билмәймән» дегән. У йәнә мухбирниң мусулман уйғурлар дуч келиватқан муамилә һәққидә илгириләп сориған соалиға: «һазирқи мениң мәсулийитим пакистан хәлқи. Шуңа, мениң 1‏-номурлуқ вәзипәм мениң өз дөлитимгә ярдәм қилиштур» дегән.

Бу пакистан баш министири имран ханниң уйғур мәсилисидин хәвири йоқлуқини тунҗи қетим билдүрүши әмәс. У бир қанчә айниң алдида «малийә вақти гезити» ниң зияритини қобул қилғанда бир қетим өзиниң уйғур мәсилисидин хәвири йоқлуқини билдүргән. Һиндистандики «асия хәлқара хәвәрләр» ториниң билдүрүшичә, имран ханниң сөзи пакистандики бәзи журналистларниң мәсхирисигә учриған. Пакистанлиқ журналист таһа сидиқи тветтирда имран ханниң сөзини тәнқидләп, униң кәшмирдики мусулманлар билән уйғур мусулманлириға «икки хил өлчәм» қолланғанлиқини әйиблигән.

Пикирләр (0)
Share
Толуқ бәт