Майкил рубин: «пакистанниң уйғурларға көз юмуши әмәлийәттә дөләт мәнпәәтини сетивәткәнликтур!»

Мухбиримиз әзиз
2020-03-17
Share

Уйғур дияридики сиясий бастурушлар «21-әсирдики әң зор зулум» дәп тәнқидлиниватқанда қошна әл пакистанниң буниңға көз юмувелиши изчил хәлқараниң әйиблишигә учрап кәлмәктә.

Америкадики әң чоң ақиллар мәркизиниң бири болған «муәссәсә институти» ниң тәтқиқатчиси майкил рубин 15-март күни «дөләт мәнпәәти» журнилида мәхсус мақалә елан қилип, бу қилмишниң әмәлийәттә пакистанниң өзи үчүнму зор бир апәттин бешарәт икәнликини тәкитлиди.

Апторниң баян қилишичә, өтмүштә пакистан изчил түрдә мусулманларға қаритилған зулум үчүн көкрәк керип оттуриға чиқишта башламчи болуп кәлгән дөләтләрниң бири икән. Болупму сабиқ совет иттипақи афғанистанға һуҗум қилған вақитларда пәләстиндики мусулманлар исраилийәниң бастурушиға дуч кәлгәндә, һәтта йеқинқи роһинга мусулманлириниң қирғин қилинишида бирдәк қаттиқ ипадә билдүргән пакистан милйонларчә уйғур лагерларға қамалғанда сүкүтни таллиған һәмдә хитайниң уйғурларни бастурушини қоллиған.

Әмдиликтә пакистан һөкүмити буниңдин һалқип уйғур дияри билән гилгит-балтистан районлирини «ача-сиңил районлар» қилип қуруп чиқишқа җиддий тәйярлиқ көрмәктә икән. Бу әмәлийәттә хитайдики ислам диниға қарши паалийәтләрниң мәркизи болған бир районда ислам вәһимисини тәшвиқ қиливатқан бир һакимийәтниң рәһбәрликигә баш қойғанлиқтин һеч пәрқи йоқ икән.

Дуняни таҗсиман вируси қаплап кетиватқанда хитайниң вухән шәһиридә оқуватқан зор сандики пакистанлиқ оқуғучиларму бу хил қулчилиқниң дәрдини тартмақта икән. Өзиниң һали билән қалған хитай һөкүмитиниң бу кесәлмән оқуғучиларниң дәрдигә дәрман болғудәк чолиси йоқ икән.

Пакистанниң йеқин қошниси вә рәқиби болған һиндистанму өзлириниң пуқралирини хитайдин чекиндүрүп чиқиватқанда имран хан башчилиқидики пакистан һөкүмити аммиви сақлиқ вә сәһийә хизмитидә көп хил қийинчилиққа дуч кәлмәктә икән. Имран хан пакистандики чириклик вә тәртипсизлик сәвәбидин пүтүн мәмликәтниң сәһийә хизмитидә еғир чекиниш мәвҗутлуқини яхши билгәчкә хитайда аллиқачан вирус билән юқумлинип болған оқуғучилар вә башқа пуқраларни пакистанға қайтуруп келиштин һәмдә вирусниң пакистанда ямрап кетишидин бәкму әнсиримәктә икән.

Апторниң баян қилишичә, пакистандики америкаға қарши кәйпият пүткүл дөләтниң хитайға йеқинчилиқ қилишиға түрткә болмақта икән. Пакистан мушу арқилиқ хитайниң «бир бәлвағ бир йол» қурулушидики «хан таҗи» болушни арзу қилсиму, әмма һазирқи реаллиқ пакистанниң барғансери өз мустәқиллиқини йоқитип, хитайниң беқиндисиға айлинип қеливатқанлиқини көрсәтмәктә икән.

Майкил рубин пакистанниң һазир өзиниң пуқралириғиму игә чиқалмайдиған болуп қеливатқанлиқини алаһидә тәкитләш билән биргә йәнә өзини «биз дегән мушу райондики асаслиқ күчләрниң бири» дәп қарап кәлгән пакистанниң аллиқачан хитайниң беқиндиси орниға чүшүп қалғанлиқини «дөләт мәнпәәтини хараб қилғанлиқ,» дәп көрситиду.

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.