Хитайниң пакистандики уйғурларға бәргән ярдими иҗтимаий таратқуларда мәсхиригә қалди

Мухбиримиз әркин
2020-05-04
Елхәт
Пикир
Share
Принт

Хитайниң пакистанда турушлуқ бир консулханиси йеқинда пакистандики уйғур муһаҗирлириға кичик қәғәз йәшикләрдә ун, гүрүч, яғ қатарлиқ ярдәм буюмлирини тарқатқан. Лекин тарқатқан ярдәм буюминиң миқдари иҗтимаий таратқуларда мәсхиригә учрап, хитайниң мәзкур аталмиш «инсанпәрвәрлик» ярдимини өз тәшвиқати үчүн суйиистемал қилғанлиқи әйибләнгән. Пакистандики «өмәр уйғур вәхписи» ниң қурғучиси өмәр хан уйғурниң билдүрүшичә, хитай консулханиси мәзкур ярдәм буюмлирини пакистандики 400 дин артуқ йәрлик уйғур муһаҗирлириға тарқатқан.

Өмәр хан сериқ қәғәз йәшиктики буюмларни видейоға елип, 4-май күни фәйсбук торида елан қилди. Униң ашкарилишичә, хитай консулханиси һәр бир аилигә 800 грам яғ, 3 кило ун, йерим кило шекәр, бир кило гүрүч тарқатқан. Өмәр хан видейода хитайниң ярдимигә баһа берип, «пакистандики уйғурларни ач қалди, дәп җиддий ярдәм қилип кетипту. Рәһмәт, хитай консулханисиниң пакистандики уйғурларға ярдәм қилғанлиқиға, лекин униң гүрүчини пакистанда тохуму йемәйду» дегән.

Бу, хитайниң пакистанда тунҗи қетим бу хил ярдәм буюмлирини тарқитиши әмәс. Буниң алдида чәтәл иҗтимаий таратқулирида қолиға хитай байриқи көтүрүвалған хадимларниң миңлиған пакистанлиқни рәткә турғузуп, һәр бир кишигә бир қачидин гүрүч тарқитиватқанлиқ син көрүнүши тарқалғаниди. Мәзкур видейо хитай һөкүмити вухәндә партлиған корона вирусиниң башқа әлләргә тарқилишиға йол қоюп, арқидин бу дөләтләргә ярдәм бериш намида өзиниң тәсирини кеңәйтиш билән әйиблиниватқан мәзгилдә елан қилинди.

Пикирләр (0)
Share
Толуқ бәт