Xitayning pakistandiki Uyghurlargha bergen yardimi ijtima'iy taratqularda mesxirige qaldi

Muxbirimiz erkin
2020-05-04
Élxet
Pikir
Share
Print

Xitayning pakistanda turushluq bir konsulxanisi yéqinda pakistandiki Uyghur muhajirlirigha kichik qeghez yeshiklerde un, gürüch, yagh qatarliq yardem buyumlirini tarqatqan. Lékin tarqatqan yardem buyumining miqdari ijtima'iy taratqularda mesxirige uchrap, xitayning mezkur atalmish "Insanperwerlik" yardimini öz teshwiqati üchün suyi'istémal qilghanliqi eyiblen'gen. Pakistandiki "Ömer Uyghur wexpisi" ning qurghuchisi ömer xan Uyghurning bildürüshiche, xitay konsulxanisi mezkur yardem buyumlirini pakistandiki 400 din artuq yerlik Uyghur muhajirlirigha tarqatqan.

Ömer xan sériq qeghez yeshiktiki buyumlarni widéyogha élip, 4-may küni feysbuk torida élan qildi. Uning ashkarilishiche, xitay konsulxanisi her bir a'ilige 800 gram yagh, 3 kilo un, yérim kilo shéker, bir kilo gürüch tarqatqan. Ömer xan widéyoda xitayning yardimige baha bérip, "Pakistandiki Uyghurlarni ach qaldi, dep jiddiy yardem qilip kétiptu. Rehmet, xitay konsulxanisining pakistandiki Uyghurlargha yardem qilghanliqigha, lékin uning gürüchini pakistanda toxumu yémeydu" dégen.

Bu, xitayning pakistanda tunji qétim bu xil yardem buyumlirini tarqitishi emes. Buning aldida chet'el ijtima'iy taratqulirida qoligha xitay bayriqi kötürüwalghan xadimlarning minglighan pakistanliqni retke turghuzup, her bir kishige bir qachidin gürüch tarqitiwatqanliq sin körünüshi tarqalghanidi. Mezkur widéyo xitay hökümiti wuxende partlighan korona wirusining bashqa ellerge tarqilishigha yol qoyup, arqidin bu döletlerge yardem bérish namida özining tesirini kéngeytish bilen eyibliniwatqan mezgilde élan qilindi.

Toluq bet