Долқун әйса пакистанниң уйғурларға қаритилған рамизан чәклимисигә сүкүт қилғанлиқини әйиблигән

Д у қ иҗраийә комитети рәиси долқун әйса пакистан һөкүмитиниң хитай уйғурларға қаратқан рамизан чәклимисигә инкас билдүрмәй җим турувалғанлиқини әйиблигән.

Долқун әйса бу сөзләрни 26-июн һиндистандин чиқидиған “һинду” гезитиниң зияритини қобул қилғанда оттуриға қойған.

Гезиттә нәқил қилишичә у мундақ дегән: “уйғурлар рамизан тутуш һоқуқидин мәһрум қалдурулиду. Биз пакистанниң башқа йәрләрдики мусулманларниң һоқуқи үчүн гәп қилғанлиқини билимиз, әмма улар хитайдики уйғурлар йолуқуватқан мәсилигә инкас билдүрүштә еһтиятчан болуп кетиду.”

У йәнә, исламабад билән бейҗиң даирилириниң чоңқур мунасивити пакистанниң мәзкур мәсилигә инкас қайғурмаслиқиға сәвәб болғанлиқини билдүргән.

Хәвәрдә көрситишичә, долқун әйса йәнә, пакистан һөкүмитиниң уйғурларниң қаршилиқ һәрикәтлирини чәкләштә бейҗиңға һәмкарлишидиғанлиқини билдүргән.

Хитай һөкүмити бу йилму уйғурларға қаратқан рамизан чәклимисини йиллардикигә охшашла давамлаштуруп қалмай, мәсчитләрдә тарави намазлирини назарәт қилиш, бир қисим җайларда мәсчитләрни тақаш вә уйғурларни һашарға һәйдәш қатарлиқ тәдбирләрни күчәйткән.

Хитайниң мәзкур тәдбирлири өзиниң диний ишлар “ақташлиқ китаби” ни елан қилип, уйғур елидики диний әркинлик вәзийитиниң “тарихтин буянқи мисли көрүлмигән дәриҗидә тәрәққиятларға еришкән” ликини тәшвиқ қилған мәзгилдә ашкариланған иди.

Һалбуки, пакистан уйғур елиға чегрилинидиған ислами дөләт болуш сүпити билән хитайниң уйғурларға қаратқан диний бесим сиясәтлирини тилға елишниң орниға, өткән һәптә ташкәнттә ечилған шаңхәй һәмкарлиқ тәшкилатиниң юқири дәриҗиликләр учришишида йәнә хитай билән хәвпсизлик һәмкарлиқини күчәйтиш һәққидә бир келишим һасил қилған иди.

Долқун әйса бундақ бир һәмкарлиқниң кәлгүсидә бигунаһ уйғурларниң адаләтсиз җазаға тартилишини күчәйтиветишидин әндишә қилидиғанлиқини билдүргән.