Dolqun eysa pakistanning Uyghurlargha qaritilghan ramizan cheklimisige süküt qilghanliqini eyibligen

Muxbirimiz jüme
2016.06.29
Share on WhatsApp
Share on WhatsApp

D u q ijra'iye komitéti re'isi dolqun eysa pakistan hökümitining xitay Uyghurlargha qaratqan ramizan cheklimisige inkas bildürmey jim turuwalghanliqini eyibligen.

Dolqun eysa bu sözlerni 26-iyun hindistandin chiqidighan “Hindu” gézitining ziyaritini qobul qilghanda otturigha qoyghan.

Gézitte neqil qilishiche u mundaq dégen: “Uyghurlar ramizan tutush hoquqidin mehrum qaldurulidu. Biz pakistanning bashqa yerlerdiki musulmanlarning hoquqi üchün gep qilghanliqini bilimiz, emma ular xitaydiki Uyghurlar yoluquwatqan mesilige inkas bildürüshte éhtiyatchan bolup kétidu.”

U yene, islam'abad bilen béyjing da'irilirining chongqur munasiwiti pakistanning mezkur mesilige inkas qayghurmasliqigha seweb bolghanliqini bildürgen.

Xewerde körsitishiche, dolqun eysa yene, pakistan hökümitining Uyghurlarning qarshiliq heriketlirini chekleshte béyjinggha hemkarlishidighanliqini bildürgen.

Xitay hökümiti bu yilmu Uyghurlargha qaratqan ramizan cheklimisini yillardikige oxshashla dawamlashturup qalmay, meschitlerde tarawi namazlirini nazaret qilish, bir qisim jaylarda meschitlerni taqash we Uyghurlarni hashargha heydesh qatarliq tedbirlerni kücheytken.

Xitayning mezkur tedbirliri özining diniy ishlar “Aqtashliq kitabi” ni élan qilip, Uyghur élidiki diniy erkinlik weziyitining “Tarixtin buyanqi misli körülmigen derijide tereqqiyatlargha érishken” likini teshwiq qilghan mezgilde ashkarilan'ghan idi.

Halbuki, pakistan Uyghur éligha chégrilinidighan islami dölet bolush süpiti bilen xitayning Uyghurlargha qaratqan diniy bésim siyasetlirini tilgha élishning ornigha, ötken hepte tashkentte échilghan shangxey hemkarliq teshkilatining yuqiri derijilikler uchrishishida yene xitay bilen xewpsizlik hemkarliqini kücheytish heqqide bir kélishim hasil qilghan idi.

Dolqun eysa bundaq bir hemkarliqning kelgüside bigunah Uyghurlarning adaletsiz jazagha tartilishini kücheytiwétishidin endishe qilidighanliqini bildürgen.

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.